Wararka24: Taliyihii hore ee Ciidanka Asluubta Soomaaliya Mahad Cabdiraxmaan Shub ayaa la geliyay xabsi guri, kadib markii ciidamada ammaanka ay la wareegeen hoygiisa, sida ay sheegeen ilo lagu kalsoon yahay.
Wararka ayaa tilmaamaya in jeneraalka lagu amray inuu ku ekaado gurigiisa, islamarkaana aan loo oggolaan inuu bannaanka u baxo ama la kulmo dad kale, iyadoo sidoo kale la xaddiday booqashooyinka.
Ciidamada ammaanka, gaar ahaan booliska, ayaa la sheegay inay si buuxda u maamulayaan ilaalinta guriga, isla markaana ay gacanta ku hayaan dhaq-dhaqaaq kasta oo la xiriira jeneraalka.
Ilo wareedyo ayaa sheegaya in tallaabadan ay ka dambeyso amar sare, inkastoo aan si rasmi ah loo shaacin sababta ka dambeysa go’aankan.
Arrintan ayaa kusoo aadeysa xilli Mahad Shub xilkii laga qaaday, loona magacaabay taliyaha cusub ee Ciidanka Asluubta Soomaaliya.
Wararka qaar ayaa sidoo kale tilmaamaya in tallaabadan ay la xiriiri karto xiisadda siyaasadeed ee u dhexeysa Dowladda Federaalka iyo maamulka Koonfur Galbeed.
Xiisaddaasi ayaa sii xoogeysanaysa, iyadoo dowladda federaalka ay wado isbeddello dhanka amniga iyo maamulka ah oo ka socda deegaannada maamulka Koonfur Galbeed.
