Wararka25: 23-02-2026 Dowladda Federaalka Soomaaliya ayaa shaacisay in lixdii bilood ee la soo dhaafay lagu dilay 17 ka mid ah madaxda iyo saraakiisha sare ee kooxda Al-Shabaab, sida uu sheegay Wasiirka Warfaafinta Xukuumadda Federaalka Soomaaliya, Daa’uud Aweys.
Wasiirka ayaa qoraal ku sheegay in ciidamada ammaanka iyo kuwa qaranka ay sii wadi doonaan hawlgallada ka dhanka ah Al-Shabaab, isaga oo xusay in dowladda ay ka go’an tahay la dagaallanka kooxaha hubeysan. Waxa uu tilmaamay in dilalkaas ay ka dhasheen hawlgallo qorshaysan oo laga fuliyay deegaanno kala duwan.
Hawlgallada la soo xusay waxaa ka mid ahaa mid ay Hay’adda Sirdoonka iyo Nabad-sugidda Qaranka ka fulisay degmada Jilib bishii Janaayo 2026, halkaas oo lagu dilay Cabdullaahi Cismaan Maxamed oo loo yaqaanay Injineer Ismaaciil, kaas oo lagu sheegay inuu ahaa mas’uul sare oo ka tirsanaa shabakadda qaraxyada ee Al-Shabaab.
Sidoo kale, hawlgal kale oo laga fuliyay gobolka Shabeellaha Hoose ayaa lagu dilay Axmed Dhubad Xidig oo loo yaqaanay Sheekh Aadan Dheere, oo saraakiisha amniga ku tilmaameen inuu ahaa mas’uul ka tirsanaa dhinaca maaliyadda ee kooxda.
Dhawr maalmood ka hor hawlgalkaasna, waxaa la dilay Cabdullaahi Xasan Cabdi Cosoble oo la sheegay inuu ahaa sarkaal sare oo maaliyadeed.
Wasiirka Warfaafinta ayaa mar kale ku baaqay in xubnaha Al-Shabaab ay ka tanaasulaan falalka hubeysan, isaga oo sheegay in dowladda ay diyaar u tahay inay soo dhaweyso kuwa isa soo dhiiba, loona diyaariyay barnaamijyo dhaqan-celin iyo dib-u-la-qabsasho bulsho.
Dowladda Federaalka Soomaaliya ayaa sheegtay in hawlgallada ka dhanka ah Al-Shabaab ay sii socon doonaan, xilli ay ciidamada qaranka kaashanayaan saaxiibada caalamiga ah si loo xoojiyo amniga iyo xasilinta deegaannada laga xoreeyay.
