Wararka25: 22-02-2026 Somaliland ayaa shaacisay inay diyaar u tahay inay Mareykanka la gasho heshiis la xiriira ka faa’iideysiga khayraadkeeda macdanta, isla markaana ay u oggolaato in Washington saldhigyo ciidan ku yeelato xeebaha Gacanka Cadmeed, sida uu wakaaladda wararka ee AFP u sheegay Wasiirka Madaxtooyada Somaliland, Khadar Xuseen Cabdi.
Wasiir Khadar Xuseen Cabdi ayaa sheegay in Somaliland ay si dhab ah u danaynayso heshiis istiraatiiji ah oo ay la gaarto Mareykanka, isaga oo xusay in ay diyaar u yihiin in Mareykanka la siiyo helitaan gaar ah oo ku saabsan macdanaha dalka iyo in saldhigyo ciidan laga hirgeliyo deegaanno ka mid ah xeebaha Somaliland.
Wasiirku waxa uu muujiyay rajo ku aaddan in wada-hadalladaas ay miro-dhal noqon doonaan, isaga oo sheegay in ay aaminsan yihiin in heshiis laga gaari karo arrimaha la xiriira iskaashiga amniga iyo ka faa’iideysiga khayraadka dabiiciga ah.
Sidoo kale, Wasiirka Madaxtooyada Somaliland ayaa xusay in aan meesha laga saarin suurtagalnimada in Israa’iil ay ka hesho saldhig ciidan deegaanno istiraatiiji ah, gaar ahaan aagga Berbera, iyadoo madaxweynaha Somaliland uu hore u sheegay in la wado wada-hadallo la xiriira macdanta iyo tiknoolajiyadda oo lala yeelanayo Israa’iil.
Warbixinta AFP ayaa tilmaantay in mas’uuliyiinta Somaliland ay sheegayaan in dhulkoodu hodan ku yahay macdano qiimo badan leh sida lithium iyo coltan, inkasta oo aan weli la helin xaqiijin madax-bannaan oo arrintaas lagu caddeeyay.
Hadalkan ayaa imanaya xilli Somaliland ay sii laba-jibbaarayso dadaalladeeda ku aaddan helitaanka aqoonsi caalami ah, kaddib markii Israa’iil bishii Diseembar muujisay taageero ay u hayso madaxbannaanida Somaliland. Dhanka kale, Dowladda Federaalka Soomaaliya ayaa si cad uga hortimid heshiis kasta oo ay Somaliland la gasho dowlad shisheeye, iyada oo ku celisay in Somaliland ay ka mid tahay Jamhuuriyadda Federaalka Soomaaliya.
