Wararka24: Dowladda Federaalka Soomaaliya ayaa dalab xasaasi ah u dirtay kooxaha taageersan madaxweynaha dowlad-goboleedka Koonfur Galbeed Cabdicasiis Lafta-gareen, iyadoo ugu baaqday inay isa soo dhiibaan.
Wasiirka Dekadaha iyo Gaadiidka Badda Cabdiqaadir Maxamed Nuur Jaamac ayaa sheegay in Lafta-gareen uu marayo marxalad adag, islamarkaana uu ka tagi doono Koonfur Galbeed sida uu hadalka u dhigay.
Wuxuu tilmaamay in qorshaha dib ugu soo laabashada xukunka ee Lafta-gareen uu la kulmay diidmo ballaaran, isla markaana laga lumiyay degmooyin muhiim ah.
Wasiirka ayaa ugu baaqay siyaasiyiinta iyo dhalinyarada weli taageersan Lafta-gareen inay ka faa’iideystaan fursadda jirta, ayna ku biiraan dhinaca dowladda federaalka.
Dhanka kale, madaxtooyada Koonfur Galbeed ayaa hore u shaacisay cafis guud oo loo fidiyay ciidamo ka tirsanaa maamulkaas oo ku biiray mucaaradka, iyadoo lagu dhiirrigeliyay inay ka qayb qaataan doorashooyinka Baydhaba.
Xiisadda u dhexeysa Dowladda Federaalka iyo Koonfur Galbeed ayaa sii kordheysa, iyadoo labada dhinac ay wadaan dhaq dhaqaaqyo iska soo horjeeda.
Waxaa jira walaac sii kordhaya oo ku aadan in khilaafkan siyaasadeed uu isu rogo iska hor imaad hubeysan haddii aan xal laga gaarin.
