Wararka24: Guddoomiyaha Golaha Shacabka Soomaaliya Sheekh Aadan Maxamed Nuur Aadan Madoobe ayaa baaqday safar uu qorsheynayay inuu ku tegi lahaa magaalada Baydhaba, kadib markii maamulka Koonfur Galbeed uu u diiday inuu gaaro halkaasi.
Warar la helay ayaa sheegaya in diyaarad sidday wafdi hordhac u ah guddoomiyaha oo ay ku jireen qaar ka mid ah ilaaladiisa laga soo celiyay hawada, kadib markii loo ogolaan waayay inay ka dagaan garoonka Shaati Gaduud, taasoo sababtay in ay dib ugu soo laabtaan Muqdisho.
Safarka Aadan Madoobe ayaa la xiriiray dadaallo lagu doonayay in lagu dejiyo xiisadda ka taagan deegaannada Koonfur Galbeed, balse ma hirgelin, iyadoo maamulkaasi uu hakiyay duulimaadyadii ku socday Baydhaba.
Ilo wareedyo ayaa sidoo kale sheegay in Koonfur Galbeed ay garoonka Baydhaba geysay hub lidka diyaaradaha, islamarkaana ay digniin u dirtay diyaaradaha qaada mas’uuliyiinta dowladda Federaalka iyo xubno mucaarad ah oo khilaaf kala dhexeeyo maamulkaasi.
Maamulka Koonfur Galbeed ayaa ku dooday in go’aankaasi uu la xiriiro sugidda amniga, si looga hortago khataro ay sheegeen inay ka iman karaan dibadda.
Dhanka kale, dowladda Federaalka Soomaaliya ayaa qaaday tallaabooyin degdeg ah, waxayna ciidamo u dirtay magaalada Baraawe, kuwaas oo la sheegay in ay xoojinayaan amniga iyo joogitaanka dowladda ee halkaasi.
Xiisadda siyaasadeed ee ka taagan Koonfur Galbeed ayaa weli taagan, iyadoo wararka laga helayo ay muujinayaan dhaqdhaqaaqyo ciidan iyo suurtagalnimada isku dhacyo hor leh.
