Wararka24: Warar kala duwan ayaa kasoo baxaya rasaas xooggan oo xalay laga maqlay qaybo kamid ah magaalada Baydhaba ee xarunta gobolka Baay, xilli ay magaalada ka jirtay xiisad u dhexeysa ciidanka maamulka Koonfur Galbeed iyo kooxo mucaarad ah.
Goobjoogayaal ayaa sheegay in rasaasta laga maqlay dhanka koonfur-bari ee magaalada, gaar ahaan aagga suuqa xoolaha, kadib markii qoriga nooca Saban ah lagu tuuray saldhig ay ciidanka ammaanka ku leeyihiin halkaasi.
Ilo deegaanka ah ayaa sheegay in qorigaasi uu ku dhacay guri ku dhow goobta saldhigga, balse aan la soo sheegin wax khasaare ah oo ka dhashay.
Dhanka kale, Wasiirka Warfaafinta Koonfur Galbeed Soomaaliya Maxamed Ibraahim Bilaal ayaa beeniyay wararka sheegaya inuu dagaal ka dhacay magaalada Baydhaba, isagoo ku tilmaamay wararkaasi kuwo aan sax ahayn.
Wasiirka ayaa sheegay in xaaladda magaalada ay tahay mid degan, isla markaana ganacsiga iyo isku socodka gaadiidka ay si caadi ah u socdaan.
Xiisaddan ayaa kusoo beegmeysa xilli Koonfur Galbeed ay ka taagan tahay muran siyaasadeed oo la xiriira doorashada maamulka, iyadoo sidoo kale ay jiraan khilaafyo siyaasadeed oo u dhexeeya dowladda federaalka iyo hoggaanka maamulka.
