Hargeysa – Fannaankii caanka ahaa ee Soomaaliyeed Xasan Jaamac Qodax, oo bulshada u badani u taqaanay Xasan Gacan, ayaa ku geeriyooday magaalada Hargeysa.
Marxuum Xasan Jaamac waxa uu ku soo biiray bahda fanka sannadkii 1986-kii, isaga oo caan ku noqday heeso iyo riwaayado muddo dheer lagu xasuusan doono. Waxaa ka mid ahaa heesaha uu qaaday “Alla Xujooy” oo uu la wada qaaday fannaanadda Ubax Fahmo, iyo heesta kale ee “Arageenna kala maqan”.
Intaa waxaa dheer, marxuumku waxa uu door muhiim ah ku lahaa riwaayado ay ka mid ahaayeen “Abydin abaydin dhalay” oo uu curiyay abwaankii caanka ahaa Axmed Aw-Geeddi (Dheeraad), iyo riwaayado kale oo qayb ka ahaa hal-abuurkiisa.
Geerida Xasan Jaamac Qodax ayaa bulshada fannaaniinta iyo dhallinyarada xiiseeya suugaanta ku noqotay murugo weyn, iyadoo si weyn loogu xasuusan doono kaalintii uu ku lahaa fanka iyo dhaqanka Soomaaliyeed.
