Wararka24: 136 xildhibaan oo ka tirsan labada gole ee Baarlamaanka Federaalka Soomaaliya ayaa taageeray qabashada doorashada Koonfur Galbeed, iyagoo digniin u diray madaxweyne Xasan Sheekh Maxamuud.
Xildhibaannadan ayaa sheegay in doorashada Koonfur Galbeed ay noqoto mid daah furan oo loo dhan yahay, isla markaana waafaqsan dastuurka iyo mabaadi’da federaalka.
War murtiyeed ay soo saareen ayay ku cambaareeyeen waxa ay ku tilmaameen tallaabooyin ay dowladda federaalka ka qaaday Koonfur Galbeed, oo ay sheegeen inay saameyn ku leeyihiin amniga iyo xasilloonida.
Waxay sidoo kale uga digeen madaxweynaha iyo xukuumaddiisa in la sii wado ku tumashada dastuurka iyo ku takri falka awoodda, iyagoo xusay in arrintaasi ay wiiqi karto nidaamka federaalka.
Xildhibaannada ayaa sheegay in haddii aan wax laga beddelin xaaladda, ay qaadi karaan tallaabooyin sharci ah oo ka dhan ah madaxweynaha, oo ay ku jirto arrimo la xiriira xil ka qaadis.
Sidoo kale waxay ugu baaqeen maamulada HirShabelle iyo Galmudug inay qabtaan doorashooyin waafaqsan dastuurkooda iyo dastuurka KMG ee dalka.
War murtiyeedkan ayaa kusoo aadaya xilli uu sii kordhayo khilaafka u dhexeeya dowladda federaalka iyo Koonfur Galbeed, kaas oo galay marxalad xasaasi ah.
