Wararka24: Safiirka Dowladda Federaalka Soomaaliya u fadhiya Switzerland iyo Austria, ahna wakiilka joogtada ah ee Soomaaliya u jooga xarunta Qaramada Midoobay ee Geneva, Danjire Khadra Axmed Ducaale, ayaa kulan soo dhaweyn ah u sameysay wafdi ka socday Guddiga Madaxa bannaan ee Xuquuqul Insaanka Qaranka.
Wafdiga oo uu hoggaaminayay Guddoomiye Dr Maryan Qaasin Axmed ayaa safiirka uga mahadceliyay dadaalladii diblomaasiyadeed ee ay ka geysatay horumarinta qaraar muhiim ah oo la xiriira xuquuqda aadanaha.
Qaraarkaas oo la gaaray bishii Oktoobar 2025 ayaa Soomaaliya siiyay awood buuxda oo ay kula socon karto una maamuli karto arrimaha xuquuqda aadanaha ee dalka.
Mas’uuliyiinta ayaa xusay in qaraarkaasi uu ahaa mid taariikhi ah, isla markaana ay hormuud ka ahayd Wasiirka Qoyska iyo Horumarinta Xuquuqul Insaanka, Khadiijo Maxamed Al Makhzoumi.
Kulanka ayaa sidoo kale qeyb ka ahaa gunaanadka booqasho shaqo oo wafdiga guddiga ay ku joogeen magaalada Geneva muddo saddex maalmood ah.
Booqashada ayaa lagu tilmaamay mid guul ku soo dhammaatay, isla markaana xoojinaysa dadaallada Soomaaliya ee dhinaca xuquuqda aadanaha.
