Wararka24: 19-02-2026 Dowladda Federaalka Soomaaliya ayaa sheegtay in hawlgallada dhulka iyo duqeymaha cirka ee ay taageerayaan ciidamada Mareykanka ay beddeleen jihada dagaalka lagula jiro Al-Shabaab, isla markaana ay suurta-geliyeen guulo milatari oo isdaba joog ah.
Mas’uuliyiinta dowladda ayaa sheegay in ciidamada Xoogga Dalka ay dib ula wareegeen deegaanno muhiim ah oo ku yaalla gobollada Shabeellaha Hoose, Shabeellaha Dhexe, Hiiraan iyo qaybo kamid ah Jubbaland, kuwaas oo ay kooxda Al-Shabaab maamuli jirtay muddo dheer.
Wasiiru-dowlaha Gaashaandhigga Soomaaliya, Cumar Cali Cabdi, ayaa sheegay in hawlgallo ay ka dhaceen deegaanno ay ka mid yihiin Jilib, Marka, Gendershe iyo Dhanaane ee Shabeellaha Hoose, iyo Taydaan iyo Yasooman ee gobolka Hiiraan, halka agagaarka Masaajid Cali Gaduud ee Shabeellaha Dhexe lagu beegsaday saldhigyo ay kooxda ku lahayd.
Dhanka Jubbaland, mas’uuliyiintu waxay sheegeen in hawlgallo wadajir ah oo ay fuliyeen ciidamada Daraawiishta Jubbaland iyo kuwa Kumaandooska Danab lagu dilay dagaalyahanno ka tirsan Al-Shabaab, isla markaana lagu burburiyay gaadiid iyo agab ay kooxdu adeegsan jirtay.
Doorka Mareykanka ee duqeymaha cirka iyo la-socodka sirdoon ayaa la sheegay inuu gacan ka geystay burburinta xarumo lagu sameeyo walxaha qarxa iyo bartilmaameedsiga hoggaanka sare ee kooxda, iyadoo AFRICOM ay sii waddo taageerada dhinaca hawada iyo xog-wadaagga.
Khubaro dhanka amniga ah ayaa sheegay in awoodda hawada, gaar ahaan diyaaradaha aan duuliyaha lahayn, ay wax ka beddeshay miisaanka dagaalka, balse ay muhiim tahay in deegaannada la xoreeyay lagu xoojiyo maamul, adeegyo bulsho iyo amni waara, si looga hortago in Al-Shabaab dib ugu soo laabato.
