Wararka24: 19-02-2026 Madaxtooyada Soomaaliya ayaa maanta martigelinaysa shir u dhexeeya Dowladda Federaalka Soomaaliya iyo Hoggaanka Golaha Mustaqbalka, oo ay ku jiraan madaxweynayaasha maamullada Puntland iyo Jubbaland, kaddib wada-hadallo horudhac ah oo maalmahan ka socday Muqdisho.
Ilo wareedyo lagu kalsoon yahay ayaa sheegay in shirka si rasmi ah u furmi doono 11:00 barqanimo, waxaana furitaanka hoggaamin doona Madaxweynaha Jamhuuriyadda Federaalka Soomaaliya, Xasan Sheekh Maxamuud, iyadoo kulanka lagu bilaabayo hab-maamuus rasmi ah.
Furitaanka shirka ayaa diiradda lagu saari doonaa xaaladda guud ee dalka, kadibna loo gudbi doono qodobada la isku waafaqsan yahay, halka qodobada muranka badan dhaliyay, oo ay ka mid yihiin hannaanka doorashooyinka iyo wax ka beddelka Dastuurka kumeel gaarka ah, loo qorsheeyay in laga wada hadlo maalmaha xiga.
Go’aanka lagu qabtay shirka gudaha Madaxtooyada ayaa yimid kaddib markii xubnaha Golaha Mustaqbalka ay hore uga caga-jiidayeen gelitaanka Villa Soomaaliya.
Tabashooyinkaas ayaa lagu xalliyay wada-hadallo horudhac ah oo Talaadadii dhacay, iyadoo dhinacyada mucaaradka la siiyay damaanad amni oo buuxda.
Habeenkii Talaadada, Ra’iisul Wasaaraha Soomaaliya, Xamza Cabdi Barre, ayaa kulan gaar ah la yeeshay madaxweynayaasha Jubbaland iyo Puntland, waxaana kulankaas lagu sheegay inuu gacan ka geystay dejinta khilaaf hore u jiray iyo diyaarinta jawi wadahadal oo u sahla qabsoomidda shirka maanta furmaya.
Shirka maanta furmaya ayaa imanaya xilli dalka uu wajahayo xaalado bani’aadannimo oo ka dhashay abaaro baahsan, iyo khilaaf siyaasadeed oo la xiriira geeddi-socodka doorashooyinka iyo wax ka beddelka dastuurka, waxaana si dhow loola soconayaa natiijada ka soo baxda wada-hadalladan.
