Wararka24: Golaha Wasiirrada Xukuumadda Federaalka Soomaaliya ayaa kulankoodii toddobaadlaha ahaa ku ansixiyay hindise sharciyeedyo, heshiisyo iyo xeer nidaamiyayaal la sheegay inay muhiim u yihiin horumarinta hay’adaha dowladda iyo iskaashiga caalamiga ah.
Qodobada la ansixiyay waxaa ka mid ah hindise sharciyeedka hey’adda maamulka garoommada diyaaradaha, sharciga la dagaallanka tahriibta iyo ka ganacsiga dadka, iyo siyaasadda qaran ee ilaalinta badqabka rayidka xilliyada howlgallada ciidan.
Sidoo kale, golaha ayaa meel mariyay heshiisyo caalami ah oo ay ka mid yihiin heshiiska badqabka socdaalka badda iyo is afgarad dhex maraya Soomaaliya iyo Spain oo ku saabsan wadatashi siyaasadeed.
Kulanka oo uu guddoomiyay Ra’iisul Wasaare Xamsa Cabdi Barre ayaa sidoo kale lagu bogaadiyay ciidamada qalabka sida ee dalka, kuwaas oo maalmahan howlgallo ka fuliyay deegaanno ay joogeen kooxaha hubeysan.
Wasaaradaha amniga iyo gaashaandhigga ayaa golaha warbixin ka siiyay howlgallada socda iyo qorsheyaasha lagu doonayo in lagu xoojiyo dagaalka ka dhanka ah kooxaha hubeysan ee weli ku sugan qeybo ka mid ah dalka.
Golaha Wasiirrada ayaa sidoo kale bogaadiyay shacabka ku dhaqan Koonfur Galbeed, gaar ahaan Baydhabo, sida ay u soo dhaweeyeen ciidamada dowladda iyo howlgaladii ka dhacay halkaasi.
Dhanka kale, xukuumadda ayaa ugu baaqday dhinacyada ku dagaallamaya gobolka Awdal inay si degdeg ah u joojiyaan colaadda, ayna qaataan wadahadal iyo is afgarad.
Xukuumadda ayaa sidoo kale ugu baaqday maamulka Somaliland iyo waxgaradka deegaanka inay door muuqda ka qaataan daminta colaadda iyo xasilinta xaaladda.
