Dowladda Federaalka Soomaaliya Warbixinta Toddobaadlaha + Faahfaahin

Wararka Ugu Aqrintabadan

‎Shiinaha oo maraakiib dagaal oo cusub u diraya Gacanka Cadmeed‎

Itoobiya oo ciidamadeeda AUSSOM kala baxday degmada Buurhakaba

Wararka24: Warbixinta Toddobaadlaha ee Dowladda Federaalka Soomaaliya ayaa maanta oo ah Sabti, 22-ka Maarso, 2025 la shaaciyey

Madaxweynaha Soomaaliya oo ku guda jira hoggaaminta dagaalka Hirshabelle
Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa ku guda jira hoggaaminta dagaalka Hirshabelle looga sifeynayo Khawaarijta, isagoo gaaray Degmada Cadale.
Kulan Madaxweynaha iyo Wasiiru-Dowlaha Imaaraadka
Madaxweyne Xasan Sheekh Maxamuud ayaa magaalada Muqdisho kulan kula qaatay Wasiiru-Dowlaha Arrimaha Dibadda ee Imaaraatka Carabta, Mudane Sheikh Shakhboot Binu Nahyaan Aala-Nahyaan.
Kormeerka jiidaha hore
Madaxweyne Xasan Sheekh Maxamuud ayaa kormeer ku tagay jiidaha hore ee degmooyinka Aadan Yabaal iyo Moqokori, halkaas oo uu ka wareystay dagaalka ka dhanka ah Khawaarijta.
Xoojinta weerarada cirka
Madaxweyne Xasan Sheekh Maxamuud ayaa kulan la qaatay hoggaanka hawlgallada Ciidamada Cirka Soomaaliyeed, isagoo ka hadlay xoojinta weerarada lagu ciribtirayo Khawaarijta.
Xilka laga qaaday La-taliyaha Madaxweynaha
Madaxweyne Xasan Sheekh Maxamuud ayaa xilka ka qaaday Mudane Maxamed Xasan Ibraahim (Qoone), oo ka mid ahaa La-taliyeyaasha madaxtooyada.
Kulan deg-deg ah oo amniga ku saabsan
Ra’iisul Wasaare Xamsa Cabdi Barre ayaa shir-guddoomiyay kulan deg-deg ah oo looga hadlayay amniga caasimadda iyo deegaannada ku xeeran, iyo hawlgallada lagu ciribtirayo kooxaha Khawaarijta.
Agaasimaha Guud ee Wasaaradda Gaashaandhigga
Ra’iisul Wasaare Xamsa Cabdi Barre ayaa u magacaabay Cabdinaafic Axmed Cabdullaahi in uu noqdo Agaasimaha Guud ee Wasaaradda Gaashaandhigga.
Dardargelinta doorashooyinka
Ra’iisul Wasaare Xamsa Cabdi Barre ayaa guddoomiyey shir looga hadlayey dardargelinta arrimaha doorashooyinka dalka, kaas oo u dhexeeyey Xukuumadda iyo xubnaha Guddiga Doorashooyinka iyo Soohdimaha dalka.
Tacsi ka dib geerida Cabdullaahi Jaamac Barre
Ra’iisul Wasaare Xamsa Cabdi Barre ayaa ka tacsiyeeyay geerida Allaha u naxariistee, Marxuum Cabdullaahi Jaamac Barre (Cascasey).
Qorshaha Isbeddelka Qaranka
Ra’iisul Wasaare Xamsa Cabdi Barre ayaa daah-furay Qorshaha Isbeddelka Qaranka (NTP 2025-2029).
Isku shaandheyn golaha wasiirada
Ra’iisul Wasaare Xamsa Cabdi Barre ayaa isku shaandheyn ku sameeyay qaar ka mid ah xubnaha Golaha Wasiirrada.
Wareejinta xilka wasiirka Ganacsiga
Ra’iisul Wasaare Ku-xigeenka, Mudane Saalax Axmad Jaamac, ayaa xilka u kala wareejiyey Wasiirka cusub ee Wasaaradda Ganacsiga iyo Warshadaha, Mudane Maxamuud Axmed Aadan (Geesood), iyo Wasiirkii hore, Mudane Jibriil Cabdirashiid Xaaji Cabdi.
Wacyigalinta doorashooyinka
Wasaaradda Warfaafinta iyo Guddiga Madaxa-bannaan ee Doorashooyinka iyo Soohdimaha Qaranka ayaa ka wada hadlay wacyigalinta doorashooyinka.
Iskaashiga Serbiya
Wasiirka Arrimaha Dibadda iyo Iskaashiga Caalamiga, Mudane Danjire Axmed Macallin Fiqi Axmed, ayaa khadka teleefoonka kula hadlay Wasiirka Arrimaha Dibadda ee Jamhuuriyadda Serbiya, Marko Djuric, iyaga oo ka wada hadlay iskaashiga labada dal.
Ciidanka Booliiska oo ku biiray dagaalka
Taliyaha Ciidanka Booliiska Soomaaliyeed, Sarreeye Guuto Asad Cismaan Cabdullaahi, ayaa Muqdisho ka sagootiyey ciidamo booliiska ka tirsan oo ku biiraya furimaha dagaalka looga soo horjeedo Khawaarijta.
Hawlgal cirka ah oo Jilib lagu qaaday
Ciidanka Qalabka Sida iyo saaxiibada caalamka ayaa hawlgal ballaaran oo dhanka cirka ah ka fuliyay degmada Jilib ee gobolka Jubada Dhexe.
NISA oo shaacisay guulo
Hay’adda Nabadsugidda Qaranka (NISA) ayaa shaacisay in hawlgalo laga fuliyay degaannada Sabiid iyo Caanoole ee Gobolka Shabeellaha Hoose, lagu dilay in ka badan 80 xubnood oo ka tirsanaa Khawaarijta.
Ciidanka Asluubta oo ku biiray dagaalka
Cutubyo ka tirsan ciidanka Asluubta ayaa ku biiray jiidaha dagaalka ka dhanka ah Khawaarijta ee ka socda gobolka Shabeellaha Dhexe.
Weerar cirka ah oo Jilib lagu qaaday
Ciidammada Xoogga Dalka Soomaliya ayaa sheegay in weerar dhanka cirka ah oo laga fuliyay degmada Jilib lagu dilay 120 ka tirsan Khawaarijta, sidoo kalana lagu burburiyey labo xarun oo ay ku sameyn jireen tababarada, qaraxyada iyo guriga horjooge Xasan Yacquub.
Hawlgal cirka ah oo Ceelbuur lagu qaaday
Ciidanka Xoogga Dalka Soomaaliya iyo saaxiibada caalamka ayaa hawlgal dhanka cirka ah ka fuliyay Degmada Ceelbuur ee gobolka Galguduud, ku dilay 9 horjooge iyo maleeshiyaadkii la socday oo ka tirsan Khawaarijta.
Duqeymo xooggan oo Jilib lagu qaaday
Duqeymo xooggan oo mar kale lagu qaadey degmada Jilib 21 Maarso, halkaasina khasaare ballaaran loogu geystey xubnaha sare ee Khawaarijta.
Hawlgal duqeyn ah oo Shabeellaha Dhexe lagu qaaday
Ciidanka Qalabka Sida oo kaashanaya Ciidanka Cirka ee Mareykanka ayaa fuliyay hawlgal duqeyn ah oo ka dhacay deegaanno kala duwan oo ka tirsan gobolka Shabeelaha Dhexe ee Hirshabelle.
Shirka Wasiirrada Arrimaha Dibadda iyo Gaashaandhigga
Safiirka Soomaaliya u fadhiya dalka Tanzania, Ilyas Cali Xasan, ayaa dalka Zimbabwe uga qeybgalay shirka Wasiirrada Arrimaha Dibadda iyo Gaashaandhigga dalalkan xubnaha ka ah urur goboleedyada Iskaashiga Dhaqaalaha Bariga Afrika (EAC) iyo Afrikada Koonfureed (SADC).
Dood cilmiyeed oo ku saabsan Golaha Ammaanka QM
Machadka Daraasaadka Diblomaasiyadda ee Wasaaradda Arrimaha Dibadda ayaa qabtey dood cilmiyeed cinwaankeedu ahaay “Muhiimadda ay leedahay in Soomaaliya mar kale ka mid noqoto Golaha Ammaanka ee Qaramada Midoobay”.
Baaq shacabka loogu diray
Dowladda Federaalka ayaa shacabka Soomaaliyeed ugu baaqday in ay ka fogaadaan goobaha fara ku tiriska ah ee ay ku harsan yihiin Khawaarijta, kuwaas oo awoodooda sii wiiqmeyso.
Nidaamka casriga ah ee shaqooyinka
Wasiirka Shaqada iyo Arrimaha Bulshada, Yuusuf Maxamed Aadan, ayaa si rasmi ah u daah-furay nidaamka casriga ah ee isku xiraya loo Shaqeeyaha iyo Shaqo-doonka (Somali National Job Portal), kaas oo wax weyn ka tari doona fududeynta helitaanka fursadaha shaqo ee dalka.
Gargaarka Jalalaqsi
Guddoomiyaha Hay’adda Maareynta Musiibooyinka, Maxamuud Macallin Cabdulle, iyo wafti uu hoggaaminayo ayaa gaaray degmada Jalalaqsi ee gobolka Hiiraan, halkaas oo la gaarsiiyay gargaar xoog leh.
Weerar ku qaaday Khawaarijta
Ciidamada Qalabka Sida iyo kuwa deegaanka Guullane ayaa weerar ku qaaday xubno Khawaarij ah oo ku dhuumaaleysanayey aagga deegaanka Laba-Garas ee gobolka Shabeellaha Dhexe.
Abaalmarinno loo guddoonsiiyay Qorshaha Isbeddelka Qaranka
Wasiirka Qorsheynta, Maxamuud Cabdiraxmaan Beene Beene, ayaa abaalmarinno guddoonsiiyay xubnihii ka shaqeeyey diyaarinta Qorshaha Isbeddelka Qaranka ee 2025-2029.
Hawlgal milatari oo Sumadaale lagu qaaday
Ciidanka Qaranka ayaa hawlgal milatari ku beegsaday horjoogayaal iyo maleeshiyaad ka tirsan Khawaarijta, kuwaas oo ku shirsanaa duleedka deegaanka Sumadaale ee gobolka Shabeellaha Dhexe.
Gargaarka Xaaji Cali
Hay’adda SoDMA ayaa deegaanka Xaaji Cali gaarsiisay 10 gaari oo siday shixnado gargaar ah oo loogu talagalay shacabkii Khawaarijta ka soo barakicisay deegaanno ka tirsan Shabeellaha Dhexe.
Taageerada dhallinyarada
Dhallinyarada Soomaaliyeed ee magaalada Muqdisho ayaa soo saaray bayaan lagu taageerayay Ciidamada Qalabka Sida ee dagaalka kula jira Khawaarijta.
Shirka yareynta abaarta
Guddoomiyaha Hay’adda Maareynta Musiibooyinka Qaranka, Mudane Maxamuud Macallin Cabdulle, ayaa magaalada Nairobi ka daah-furay shirka yareynta khatarta abaarta ku dhufatay Soomaaliya.
Hawlgalo milatari oo Galgaduud lagu qaaday
Ciidamada Qalabka Sida ayaa hawlgalo milatari oo ka dhan ah Khawaarijta ka fuliyay deegaanno ku teedsan Sinadhaqo, Labi-Dulle, iyo Dhabanna Dhulkuheys ee gobolka Galgaduud.
Gargaarka Hiiraan iyo Shabeellaha Dhexe
Hay’adda Maareynta Musiibooyinka (SoDMA) ayaa furimaha gobollada Hiiraan iyo Shabeellaha Dhexe u dirtay dhaqaatiir, gawaarida gargaarka degdegga ah iyo daawo loogu talagaley in lagu taageero geesiyaasha xaq u dirirka ah ee u taagan xoreynta dalka.
Shir-weynaha Maareynta Deymaha Caalamiga ah
Hantidhowraha Guud ee Soomaaliya, Axmed Ciise Guutaale, ayaa ka qaybgalaya Shir-weynaha Maareynta Deymaha Caalamiga ah ee Ganacsiga iyo Horumarinta Qaramada Midoobay (UNCTAD), kaas oo ka socda magaalada Geneva ee dalka Switzerland.
Kaarka aqoonsiga dadweynaha
Wasaaradda Arrimaha Gudaha ayaa sheegtay in kaarka aqoonsiga dadweynaha uu yahay xaq muwaadinka leeyahay.
Hawlgal qorshaysan oo Gal-haruur lagu qaaday
Hawlgal qorshaysan oo ciidamo ka tirsan macawiisleyda gobolka Shabeellaha Dhexe ay ka fuliyeen deegaanka Gal-haruur oo hoostaga degmada Aadan Yabaal ayaa lagu dilay labo dhagarqabe oo Khawaarij ah, iyadoo laga soo furtay labo qori AK-47 ah iyo mooto Fekon ay wateen.
NISA oo gacanta ku soo dhigay dhagar-qabayaal
Ciidanka Hay’adda Sirdoonka iyo Nabadsugidda Qaranka Soomaaliyed (NISA) ayaa gacanta ku soo dhigay dhagar-qabayaal doonayay in ay qaraxyo soo galiyaan magaalada Muqdisho.