Wararka24: Taliyaha Ciidanka Dhulka Xoogga Dalka Soomaaliyeed, Sahal Cabdullaahi Cumar, ayaa kulan la qaatay Taliyaha Ciidamada Mareykanka ee Geeska Afrika, General Brown, iyagoo ka wada hadlay dardargelinta howlgalada ka dhanka ah kooxaha hubeysan.
Kulanka ayaa diiradda lagu saaray xoojinta iskaashiga u dhexeeya Ciidanka Xoogga Dalka Soomaaliyeed iyo howlgalka AFRICOM, gaar ahaan taageerada dhinacyada amniga iyo la dagaallanka kooxaha hubeysan.
Taliyaha Ciidanka Dhulka ayaa uga mahadceliyay Dowladda Mareykanka taageerada ay siiso ciidamada Soomaaliya, isagoo xusay muhiimadda ay leedahay iskaashiga labada dhinac.
Dhankiisa, General Brown ayaa sheegay in ay sii xoojin doonaan garab istaagga ay siinayaan Ciidanka Xoogga Dalka Soomaaliyeed, si loo dardar geliyo howlgalada ka socda dalka.
Wuxuu sidoo kale tilmaamay in AFRICOM ay sii wadi doonto taageerada ay siiso Soomaaliya, iyadoo qeyb ka ah dadaallada lagu sugayo amniga iyo xasiloonida.
Kulankan ayaa kusoo aadaya xilli ciidamada dowladda ay kordhiyeen howlgalada ka dhanka ah kooxaha hubeysan ee ka jira qaybo badan oo dalka ah.
