Masuuliyiin ka tirsan maamulka Puntland ayaa si guul leh u xalliyeen xiisad hubeysan oo dhowaan ka dhacday degmada Eyl ee gobolka Nugaal, taasoo u dhexeysay ciidanka booliska iyo qaar ka mid ah dhalinyarada deegaanka.
Xiisaddan ayaa bilaabatay kadib isku dhac xooggan oo dhacay Jimcihii hore, kaasoo sababay dhimashada hal qof iyo dhaawac soo gaaray saddex qof oo kale. Marxuumka ayaa lagu magacaabi jiray Cabdirashiid Abshir Muuse, waxaana meydkiisa muddo toban maalmood lagu hayay tallaagad iyadoo xal loo raadinayay xiisadda.
Waxaa maanta si rasmi ah loo aasay marxuumka, iyadoo dowladda Puntland ay ballanqaaday magta la siinayo qoyska. Tallaabadan ayaa ah mid lagu soo afjaray khilaafkii, iyadoo ay ka qeyb qaateen mas’uuliyiin, odayaasha dhaqanka iyo bulshada deegaanka.
Dowladda Puntland ayaa hore u sheegtay inay sii wadi doonto dadaallada lagu xallinayo khilaafaadka noocan oo kale ah, si loo xaqiijiyo nabad iyo xasilooni ka dhex jirta gobolka.