Dowladda Mareykanka ayaa si rasmi ah u muujisay walaac ballaaran oo ku saabsan jihada siyaasadeed ee uu qaaday Madaxweynaha Soomaaliya, Xasan Sheekh Maxamuud, iyadoo si gaar ah u tilmaantay in xukuumaddiisu ay xooga saartay arrimo siyaasadeed oo gudaha ah halkii ay mudnaan siineysay dagaalka lagula jiro al-Shabaab.
Sida laga soo xigtay ilo xog-ogaal ah oo ka tirsan Aqalka Cad, Mareykanku wuxuu dareemayaa in dowladda Federaalka Soomaaliya aysan si buuxda diiradda u saarin dagaalka lagula jiro kooxaha xagjirka ah, taas oo keeni karta in kooxda al-Shabaab ay fursad u hesho inay dib usoo xoogeysato meelo ka mid ah dalka.
Walaacani wuxuu imaanayaa iyadoo gudaha Soomaaliya uu ka socdo loolan siyaasadeed oo xasaasi ah, gaar ahaan xagga doorashooyinka iyo is mariwaaga u dhexeeya dowladda dhexe iyo dowlad goboleedyada.
Waxaa sidoo kale soo badanaya dhaleeceynta laga jeedinayo hab-maamulka dowladda federaalka, gaar ahaan dhinacyada amniga iyo wada shaqeynta hay’adaha qaranka.
Si kastaba ha ahaatee, Mareykanka ayaa mar kale muujiyey in uu sii wadi doono taageerada uu siiyo Soomaaliya, gaar ahaan tababarada iyo qalabeynta ciidamada xoogga dalka iyo taageerada lagu bixiyo howlgalka nabad ilaalinta Midowga Afrika ee ATMIS.
Diblomaasiyiin ka socda gobolka iyo kuwa caalamiga ah ayaa sidoo kale walaac ka muujinaya in khilaafaadka siyaasadeed ee sii kordhaya ay caqabad ku noqon karaan dadaallada dib-u-dhiska dalka iyo sugidda amniga guud.
