Nairobi – Madaxweyne Cabdiraxmaan Maxamed Cabdilaahi (Cirro) oo hoggaaminaya maamulka Somaliland ayaa maanta la kulmay Madaxweynaha Kenya, William Ruto, xilli uu booqasho rasmi ah ku joogo magaalada Nairobi.
Kulanka labada mas’uul ayaa diiradda lagu saaray arrimaha muhiimka u ah labada dhinac, iyadoo la isla gartay qodobo dhawr ah oo horumarinta gobolka ku saabsan.
Qodobada Muhiimka ah ee Laga Wada Hadlay
Horumarinta Dhaqaalaha
Madaxweynayaasha ayaa ka wada hadlay sidii loo xoojin lahaa iskaashiga dhaqaale ee labada dal. Waxay isla gaarteen in la ballaadhiyo xidhiidhka ganacsi ee ka dhexeeya labada dhinac, la kordhiyo maalgashiga wadajirka ah, iyo in la fududeeyo isu-socodka diyaaradaha si loogu fududeeyo ganacsiga iyo dadka.
Arrimaha Nabadda iyo Amniga
Kulanka waxaa sidoo kale looga hadlay baahida loo qabo in la xoojiyo amniga gobolka Geeska Afrika. Labada hoggaamiye waxay ku heshiiyeen in ay si wada jir ah uga wada shaqeeyaan sidii loo sii xoojin lahaa xasilloonida gobolka, looga hortagi lahaa khatarta argagixisanimo, iyo in la taageero dadaallada nabadeed ee ka socda gobolka.
Waxbarashada iyo Tababarka
Madaxweyne Cirro iyo Madaxweyne Ruto waxay isla gaarteen in la xoojiyo iskaashiga dhinaca waxbarashada. awood-dhisidda hay’adaha dawladeed, iyo barnaamijyo tababar oo loogu talagalay in lagu kobciyo xirfadaha farsamada gacanta ee dhalinyarada somaliand.
Iskaashiga cusub ee laga hadlay ayaa la filayaa in uu door weyn ka ciyaaro kobaca dhaqaalaha somaliland, gaar ahaan xagga ganacsiga iyo maalgashiga. Sidoo kale, waxaa la rajeynayaa in tababarka dhalinyarada uu gacan ka geysan doono abuurista fursado shaqo iyo horumarinta xirfadaha cusub.
Booqashada Madaxweyne Cirro ee Kenya ayaa qayb ka ah dadaalladiisa uu ku doonayo in uu xoojiyo xidhiidhka caalamiga ah ee Somaliland iyo in uu balaadhinayo iskaashiga dalalka jaarka ah.
