Wararka24: Dowladda Kenya ayaa qorsheyneysa inay kordhiso ciidamada ammaanka ee ka howlgala deegaannada ku teedsan xadka ay la wadaagto Soomaaliya, kaddib markii ay soo bateen weerarro ay mas’uuliyaddooda sheegatay kooxda Al-Shabaab. Tallaabadan ayaa qayb ka ah dadaallada Nairobi ay ku xoojinayso amniga gobollada xuduudda.
Sida ay baahiyeen warbaahinta Kenya oo soo xiganeysa mas’uuliyiin ka tirsan dowladda, ciidamada dheeraadka ah ayaa isugu jiri doona boolis iyo cutubyo kale oo amni. Ciidamadan ayaa loo daabulayaa deegaannada loo arko inay khatar amni ka jirto, si loo adkeeyo sugidda nabadgelyada loona kordhiyo joogitaanka ciidamada.
Wararka ayaa sheegaya in ciidamadaasi ay fulin doonaan howlgallo baaritaan iyo roondooyin joogto ah oo laga sameynayo deegaannada lagu tuhunsan yahay inay ku sugan yihiin xubno ka tirsan Al-Shabaab. Dowladda Kenya ayaa aaminsan in deegaannadaasi ay kooxda u adeegsato abaabulka weerarro ka dhan ah ciidamada ammaanka iyo mas’uuliyiinta dowladda.
Sidoo kale, ilo ka tirsan dowladda Kenya ayaa sheegay in Madaxweyne William Ruto loo gudbiyay qorsheyaal cusub oo lagu xoojinayo amniga dalka, iyadoo mudnaanta la siinayo ka hortagga weerarrada Al-Shabaab iyo sare u qaadidda awoodda ciidamada ka howlgala gobollada xuduudda.
Qorshayaashan ayaa kusoo beegmaya xilli Kenya ay wajahaysay weerarro amni oo soo noqnoqday, kuwaas oo inta badan ka dhacay gobollada waqooyi-bari ee dalka, gaar ahaan meelaha ku dhow xadka Soomaaliya. Dowladda Kenya ayaa sheegtay inay sii wadi doonto tallaabooyinka lagu sugayo amniga iyo la dagaallanka kooxaha hubeysan.
Maalmo ka hor, Al-Shabaab ayaa sheegatay mas’uuliyadda weerar lagu dilay saraakiil ka tirsan ciidamada ammaanka Kenya oo ka dhacay ismaamulka Mandheera. Dowladda Kenya ayaan weli shaacin in la qabtay cid lala xiriirinayo weerarkaas, inkastoo howlgal ballaaran oo amni la sameeyay kaddib dhacdada.
Kenya ayaa muddo dheer ka waday howlgallo amni gudaha dalkeeda iyo Soomaaliya oo ka dhan ah Al-Shabaab, iyadoo dowladda Nairobi ay marar badan ku celcelisay inay sii xoojin doonto tallaabooyinka lagu ilaalinayo amniga xuduudaha iyo ka hortagga weerarrada ay kooxdu ka fuliso gudaha dalka.
