Wararka24: Golaha Mustaqbalka Soomaaliya ayaa beeniyay warar sheegayay inay beesha caalamka ka codsadeen in Soomaaliya dib loogu celiyo marxalad ku-meel-gaar ah. Xildhibaan Cabdiraxmaan Cabdishakuur Warsame ayaa sheegay in warqaddii ay u direen beesha caalamka ay ahayd soo jeedin siyaasadeed oo lagu maareynayo xaaladda ka dhalatay muranka doorashooyinka iyo dhammaadka muddo-xileedka dowladda, balse aysan ahayn codsi lagu soo celinayo nidaamka ku-meel-gaarka.
Cabdiraxmaan Cabdishakuur ayaa sheegay in soo jeedintoodu ahayd in la dhiso gole ku-meel-gaar ah oo maamula arrimaha doorashada iyo marxaladda kala-guurka, haddii aan la helin xukuumad xil-gaarsiin ah. Wuxuu xusay in ujeeddada ugu weyn ee farriintooda ay ahayd in bulshada caalamka loo muujiyo in caqabadaha Soomaaliya ay yihiin kuwo siyaasadeed oo u baahan xal siyaasadeed.
“Farriintayadu waxay ahayd in dhibaatada Soomaaliya ay tahay mid siyaasadeed, xalkeeduna uu yahay siyaasad, ee aan lagu xallin karin oo keliya ciidan iyo dhaqaale,” ayuu yiri Xildhibaan Cabdiraxmaan Cabdishakuur Warsame.
Xildhibaanka ayaa sidoo kale sheegay in Dastuurka Ku-meel-gaarka ah uu dhigayo in marka uu dhammaado muddo-xileedka dowladda ay xukuumaddu isu beddesho xukuumad xil-gaarsiin ah. Wuxuu ku eedeeyay dowladda Federaalka inay ka gaabisay qaadashada doorkaasi, taas oo uu sheegay inay sii adkaysay muranka siyaasadeed.
Sida uu sheegay, golaha ay soo jeediyeen wuxuu qaban lahaa shaqooyinka laga filayo xukuumad xil-gaarsiin ah, sida kormeerka doorashooyinka, fududeynta heshiisyada siyaasadeed iyo hubinta dhexdhexaadnimada hay’adaha amniga inta lagu jiro geeddi-socodka doorashada.
Cabdiraxmaan Cabdishakuur ayaa sidoo kale sheegay in sii shaqeynta dowladda kaddib dhammaadka muddo-xileedkeeda ay saameyn ku yeelan karto sharciyadda hay’adaha dowladda, isagoo xusay in beesha caalamku muhiimad gaar ah siiso jiritaanka hay’ado leh sharciyad buuxda marka ay timaaddo iskaashiga siyaasadeed, amniga iyo dhaqaalaha.
Ugu dambeyn, wuxuu ugu baaqay madaxda dowladda inay muujiyaan masuuliyad siyaasadeed, kana fogaadaan waxa uu ku tilmaamay “siyaasadda qamaarka”, isagoo adkeeyay in Soomaaliya ay u baahan tahay wada-hadal, is-afgarad iyo xal siyaasadeed oo lagu xalliyo ismariwaaga ka taagan arrimaha doorashooyinka.
