Wararka24: Warar kala duwan ayaa kasoo baxaya dagaal culus oo gelinkii dambe ee Arbacadii ka dhacay bannaanka magaalada Baydhaba, kaas oo dhex-maray ciidamada Dowladda Federaalka Soomaaliya iyo maleeshiyaad ka tirsan Al-Shabaab.
Ilo wareedyo amni ayaa sheegay in ciidamada dowladda oo roondo amni ku jiray ay la kulmeen maleeshiyaad ku sugnaa aagga, taasoo sababtay iska hor imaad toos ah oo socday muddo kooban.
Ugu yaraan shan askari oo ka tirsanaa ciidamada dowladda ayaa la xaqiijiyay inay ku dhinteen dagaalka, sida ay warbaahinta u sheegeen ehellada qaar kamid ah askarta.
Sidoo kale, meydadka askarta dhimatay ayaa la sheegay in loo soo qaaday magaalada Muqdisho, halkaas oo aas loogu sameynayo.
Dhanka kale, wararka ayaa tilmaamaya in maleeshiyaadka Al-Shabaab ay iyaguna soo gaareen khasaare isugu jira dhimasho iyo dhaawac, inkastoo aan si rasmi ah loo caddeyn tirada.
Xaaladda deegaanka ayaa saaka deggan, waxaana weli aan jirin wax war rasmi ah oo kasoo baxay saraakiisha dowladda oo ku saabsan dagaalkaasi.
Dagaalladan ayaa kusoo aadaya xilli ay sii kordhayaan howl-gallada militari ee ka socda gobolka Baay, iyadoo dowladda ay ciidamo dheeraad ah geysay magaalada Baydhaba iyo deegaannada ku xeeran.
