Wararka24: Urur-goboleedka (IGAD) ayaa soo dhaweeyay wada-hadalladii Muqdisho ku dhexmaray Dowladda Federaalka Soomaaliya iyo dhinacyada mucaaradka, kuwaas oo socday intii u dhaxeysay 13 illaa 15 May 2026.
War-saxaafadeed kasoo baxay xoghayaha guud ee IGAD ayaa lagu sheegay in ururku si dhow ula socday natiijada wada-tashiyada, islamarkaana uu muhiimad gaar ah siinayo in la sii wado wada-hadallada siyaasadeed si xal looga gaaro khilaafaadka weli taagan.
IGAD ayaa sheegtay in wada-hadal joogto ah uu muhiim u yahay ilaalinta xasilloonida dalka, xoojinta nidaamka dimuqraadiyadda iyo horumarinta dowladnimada Soomaaliya, xilli uu dalka wajahayo marxalad siyaasadeed oo xasaasi ah.
“Dhammaan dhinacyada Soomaalida waa inay raadiyaan xalal xoojinaya midnimada qaranka, kalsoonida shacabka iyo xasilloonida muddada dheer,” ayaa lagu yiri bayaanka kasoo baxay ururka.
Sidoo kale, urur-goboleedka IGAD ayaa markale xaqiijiyay taageerada uu u hayo dadaallada ay Soomaalidu hoggaaminayso ee lagu dhisayo dowlad loo dhan yahay, nabad waarta iyo mustaqbal deggan oo Soomaaliya iyo guud ahaan gobolka Geeska Afrika ah.
Bayaankan ayaa kusoo aadaya kadib markii ay natiijo la’aan kusoo dhammaadeen wada-hadalladii dowladda federaalka iyo mucaaradka ee ka dhacay xerada Xalane, kuwaas oo ay garwadeen ka ahaayeen xubno ka tirsan beesha caalamka.
Dowladda Federaalka Soomaaliya iyo siyaasiyiinta mucaaradka ayaa weli isku khilaafsan arrimaha doorashooyinka, dastuurka iyo maamulka marxaladda kala guurka, iyadoo beesha caalamka ay ku baaqeyso in xal lagu gaaro wada-hadal iyo isu tanaasul siyaasadeed.
