Wararka24: Shacabka ku nool magaalada Muqdisho ayaa weli wajahaya dhibaatooyin la xiriira helitaanka kaarka Aqoonsiga Qaranka, inkasta oo Hay’adda Aqoonsiga iyo Diiwaangelinta Qaranka ay sheegtay in horumar laga sameeyay nidaamka diiwaangelinta iyo aqoonsiga dhijitaalka ah.
Hay’adda NIRA ayaa shaacisay in in ka badan 1.4 milyan oo qof la diiwaangeliyay illaa bishii Maarso 2026, balse muwaadiniin badan ayaa sheegay in aysan wali helin kaararkoodii aqoonsiga, inkastoo ay isdiiwaangeliyeen sanadkii hore.
Dad badan ayaa sidoo kale ka cabanaya safaf dhaadheer iyo ciriiri ka jira xarumaha diiwaangelinta, iyadoo qaar kamid ah shacabka ay sheegeen inay waaberiga hore tagaan goobaha adeegga si ay u helaan fursad diiwaangelin ama xog saxitaan.
Cabashooyinka ayaa sii xoogeysanaya kadib markii dowladda federaalka ay ku xirtay adeegyo muhiim ah haysashada Aqoonsiga Qaranka. Muwaadiniinta ayaa sheegay in arrintaasi ay caqabad ku noqotay helitaanka baasaboorka, shahaadooyinka dowladda iyo adeegyo kale oo muhiim ah.
Maareeyaha Guud ee NIRA, Cabdiweli Cali Cabdulle Timacadde, ayaa hore u sheegay in nidaamka Aqoonsiga Qaranku yahay tiir muhiim u ah casriyeynta adeegyada dowladda iyo mideynta xogta muwaadiniinta Soomaaliyeed.
Dowladda Soomaaliya ayaa ku doodaysa in Aqoonsiga Qaranku muhiim u yahay sugidda amniga, xaqiijinta muwaadinnimada iyo fududeynta adeegyada dowladda, kadib tobannaan sano oo dalka uusan lahayn diiwaan qaran oo mideysan.
Dhanka kale, nidaamkan ayaa wajahaya caqabado siyaasadeed iyo deegaan, maadaama maamullada Puntland iyo Jubaland ay hore uga muujiyeen diidmo la xiriirta hirgelinta Aqoonsiga Qaranka. Sidoo kale, maamulka Somaliland ayaan laga hirgelin nidaamkan, maadaama ay sheegato in ay ka go’ay Soomaaliya.
Khubarada qaar ayaa aaminsan in inkasta oo mashruucan uu muhiim u yahay dowlad-dhiska, haddana loo baahan yahay in wax laga qabto gaabiska adeegyada, dib u dhaca kaararka iyo cabashooyinka shacabka si loo helo kalsoonida bulshada.
