Wararka24: Afhayeenka madaxweynihii hore ee Koonfur Galbeed, Ugaas Xasan Cabdi Maxamed, ayaa qoraal uu soo saaray kaga hadlay xaaladda siyaasadeed ee ka jirta maamulkaasi, kadib isbeddelladii dhowaan dhacay.
Afhayeenka ayaa ugu baaqay shacabka Koonfur Galbeed in la iska dhaafo khilaafaadka, isla markaana laga wada shaqeeyo danta guud iyo xasilloonida deegaanka.
Wuxuu si gaar ah fariin ugu diray dhalinyarada, haweenka, odayaasha dhaqanka iyo culimada, isaga oo ku booriyay inay door muuqda ka qaataan nabadda iyo horumarka.
“Waa in aan ka shaqeynaa is-afgarad, wadahadal iyo is-ixtiraam, danta guudna laga hormariyaa tan gaarka ah,” ayuu yiri afhayeenku.
Sidoo kale, wuxuu dhalinyarada ugu baaqay inay ka fogaadaan wax kasta oo kala qeybinaya bulshada, isla markaana diiradda saaraan waxbarashada iyo horumarinta naftooda.
Afhayeenka ayaa sidoo kale ka digay in aan la siin fursad cid kasta oo doonaysa burburinta dowladnimada iyo midnimada bulshada.
Hadalka ayaa imanaya xilli ay weli taagan tahay xaalad siyaasadeed oo kacsan oo ka jirta Koonfur Galbeed, kadib isbeddelkii hoggaanka maamulkaasi.
