Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xalay ku booqday Degmada Moqokori ee Gobolka Hiiraan, halkaas oo uu kula kulmay saraakiisha ciidamada ee hoggaamineysa hawlgalka lagaga saarayo maleeshiyaadka Al-Shabaab gobolkaasi.
Kulankan oo uu goobjoog ka ahaa Madaxweyne Kuxigeenka Hirshabelle, Yuusuf Axmed Hagar (Yuusuf Dabageed), ayaa lagaga hadlay wejiga labaad ee hawlgalka ka socda Hirshabelle.
Qoraal ka soo baxay Villa Somalia ayaa lagu sheegay in Madaxweynuhu uu xubnahaasi ka wareystay guulaha la gaaray iyo caqabadaha jira.
“Madaxweynaha ayaa ka xog wareystay Madaxweyne Kuxigeenka Hirshabelle iyo Hoggaanka Ciidamada jiidda hore, guulaha iyo caqabadaha jira, iyagoo soo bandhigay sida ay ciidamada u dhiirigelinayso in Madaxweynihii Qaranka uu kula sugan yahay furinta dagaalka, si dhowna ula socdo guulaha, baahiyaha iyo geesinimada Ciidanka Soomaaliyeed,” ayuu ku qoray qoraalka.
Madaxweyne Xasan Sheekh Maxamuud ayaa waxaa kulanka ku wehlinayay Agaasimaha Hay’adda Nabad Sugidda & Sirdoonka Qaranka (NISA), Cabdullaahi Maxamed Cali (Sanbaloolshe).
Madaxweynaha ayaa Hirshabelle u jooga dardargelinta dagaalka ay Ciidamada Dowladda iyo kuwa Difaaca Shacabka kula jiraan Shabaabka hubeysan ee dalka ka dagaalama.
📌 Wararka24 – Xog rasmi ah oo faahfaahin degdeg ah