Wararka24: 4-02-2026 Maamulka Puntland ayaa si adag u cambaareeyay weerar ay ku eedeeyeen in aroortii hore lagu qaaday xildhibaanno iyo senatarro ka soo jeeda Puntland oo ku sugnaa hotel ku yaalla magaalada Muqdisho.
War-saxaafadeed kasoo baxay Puntland ayaa lagu sheegay in abbaaro 3:00 habeenimo ciidamada ammaanka ay galeen Hotel Airport ee Muqdisho, halkaas oo ay deganaayeen xildhibaanno iyo senatarro ka tirsan Baarlamaanka Federaalka Soomaaliya. Puntland ayaa sheegtay in dhacdadaasi ay ku lug lahayd gacan-qaad iyo afduub.
Sidoo kale, maamulka Puntland ayaa sheegay in la kaxeystay Axmed Cabdi Maxamuud Hurre oo ah la-taliyaha Madaxweynaha Puntland ee arrimaha bulshada, iyadoo lagu tilmaamay tallaabadaasi mid sharci-darro ah oo aan loo marin hannaan rasmi ah.
“Falkan waa mid dhaawacaya nidaamka federaalka iyo wada shaqeynta hay’adaha dowladda,” ayaa lagu yiri war-saxaafadeedka Puntland, oo sidoo kale mas’uuliyadda wixii ka dhasha dhacdada dusha ka saartay Dowladda Federaalka Soomaaliya.
Puntland ayaa ku adkeysatay in aanay jirin wax dacwad ama eedeyn sharci ah oo loo hayay xubnaha lagu weeraray hotelka, isla markaana aan la marin habraac sharci ah kahor inta aan tallaabada la qaadin.
Ilaa iyo hadda ma jiro wax war ah oo si rasmi ah uga soo baxay Dowladda Federaalka Soomaaliya oo ku saabsan eedeymahaasi.
Dhacdadan ayaa kusoo aadaysa xilli la filayo in labada aqal ee Baarlamaanka Federaalka Soomaaliya ay yeeshaan fadhi muhiim ah oo lagu codeynayo wax ka beddelka dastuurka dalka, iyadoo in ka badan 30 xildhibaan oo ka soo jeeda Puntland ay horay u muujiyeen diidmo ku aaddan isbeddelkaas.
