Wararka24: Muwaadiniin ku nool Iiraan ayaa muujiyay walaac sii kordhaya kadib hanjabaado kasoo yeeray madaxweynaha Mareykanka Donald Trump oo ku saabsan suurtagalnimada weerarro lagu qaado kaabayaasha tamarta ee dalkaas.
Warbaahinta BBC Persian ayaa soo bandhigtay aragtiyo laga helay dad ku nool magaalooyinka Tehran iyo Karaj, kuwaas oo ka cabsi qaba saameynta ay hanjabaadahan ku yeelan karaan noloshooda maalinlaha ah.
Qaar ka mid ah dadka la wareystay ayaa sheegay in ay filayeen in Mareykanku kala saaro dowladda iyo shacabka, balse ay hadda ka baqayaan in weerarro ay si toos ah u saameeyaan nolosha dadka rayidka ah.
Dadka ayaa si gaar ah uga walaacsan go’itaanka adeegyada aasaasiga ah sida korontada iyo biyaha, kuwaas oo la sheegay inay dhibaato weyn ku keeni karaan bulshada haddii la beegsado kaabayaasha tamarta.
Qaar kale ayaa xusay in xaaladdu ay saameyn ku yeelan karto nidaamka bangiyada iyo adeegyada internet-ka, taasoo ka dhigeysa nolol maalmeedka mid adag haddii dagaalku sii fido.
Waxaa sidoo kale jira dad aaminsan in hanjabaadaha Trump ay noqon karaan cadaadis siyaasadeed oo kaliya, inkastoo cabsi laga qabo cawaaqibka haddii ay dhab noqdaan.
Xaaladda guud ayaa weli ah mid kacsan, iyadoo xiisadda u dhexeysa Mareykanka iyo Iiraan ay sii kordheyso, taasoo saameyn ku yeelan karta shacabka iyo amniga gobolka.
