Kraaifontein – Wararka24: Warar cusub ayaa kasoo baxaya dil galinkii dambe ee shalay loogu geystay muwaadin Soomaaliyeed oo lagu magacaabi jiray Maxamed Nuur Cadde, kadib markii kooxo burcad ah ay ku weerareen goobtiisa ganacsi oo ku taalla deegaanka Kraaifontein, magaalada Cape Town ee dalka Koonfur Afrika.
Goobjoogayaal ayaa sheegay in burcaddii falka geysatay ay si degdeg ah uga baxsadeen goobta, halkaas oo Maxamed Nuur Cadde uu ku dhintay isagoo goobtiisa shaqo ku jira.
Marxuumka ayaa ka mid ahaa dhalinyarada si weyn looga yaqaanay deegaanka, isla markaana muddo dheer halkaas ku lahaa ganacsi.
Booliiska Koonfur Afrika ayaa gaaray goobta saacado kadib, balse baaritaannada hordhaca ah ma aysan soo saarin wax natiijo ah oo ku saabsan cidda ka dambeysa weerarka. Ilaa hadda lama hayo cid loo qabtay falkaas.
Dilka Maxamed Nuur Cadde ayaa ka mid noqonaya weerarrada isdaba-joogga ah ee sanad kasta lagu bartilmaameedsado ganacsatada Soomaaliyeed ee ku nool Koonfur Afrika — kuwaas oo wajahaya dilal, dhac iyo dhaawacyo soo noqnoqda, iyadoo aan jirin wax tallaabo muuqata ah oo dowladdu ka qaadday.
Dadka Soomaaliyeed ee ku dhaqan Cape Town ayaa sheegay in bilaha dambe ee sanad kasta ay noqdaan kuwa ugu badan ee dhaca iyo dilalka loo geysto muwaadiniinta Soomaaliyeed ee halkaas ku shaqeysta.
