Waxaa markale cirka isku shareeray hadal-haynta siyaasadda Soomaaliya, kadib markii Wasiirka Difaaca, Axmed Macallim Fiqi, uu weerar afka ah ku qaaday Ra’iisul Wasaarihii hore, Maxamed Xuseen Rooble.
Fiqi ayaa Rooble ku sifeeyay “nin inta badan maskaxdiisu maqan tahay,” isaga oo ku eedeeyay inuusan lahayn karti siyaasadeed iyo aragti qoto dheer oo uu dalka ku hoggaamiyo. Wasiirku wuxuu xusay in magacaabistii Rooble ee xilka Ra’iisul Wasaaraha sanadkii 2020 ay ahayd mid aan sal lahayn.
Dhankiisa, Rooble oo maanta hadal ka jeediyay shir looga hadlayay xaaladda siyaasadda dalka, ayaa dhaliil culus u jeediyay dowladda federaalka. Wuxuu ku eedeeyay in Villa Soomaaliya ay ku hanjabeyso burburinta Somaliland, isla markaana ay carqalad ku tahay taageerada iyo mucaawinada caalamiga ah ee shacabka halkaas ku nool. Rooble ayaa intaa ku daray in Somaliland ay ku socoto jid wanaagsan oo xasillooni iyo maamul ah, balse dowladdu ay caqabad ku noqotay horumarkaasi.
Is-weydaarsigan hadallada kulul ayaa dhaliyay hadal-hayn ballaaran oo gudaha iyo dibadda dalka ah. Qaar ka mid ah dadka falanqeeya siyaasadda ayaa ku tilmaamay xiisad ka dhex qaraxday dowladda iyo mucaaradka, halka kuwo kale u arkeen dood siyaasadeed oo caadi ah oo ku saabsan jihada iyo mustaqbalka Soomaaliya. Ilaa iyo hadda, Villa Soomaaliya kama aysan hadlin dhaliisha Rooble, marka laga reebo jawaabtii Fiqi.
