Madaxweynihii hore ee Soomaaliya, Mudane Maxamed Cabdullahi Farmaajo, oo haatan dibad-joog ah, ayaa dalka Qatar ka bilaabay dhaq-dhaqaaqyo siyaasadeed oo la xiriira doorashooyinka soo socda ee 2026-ka.
Farmaajo, ayaa bilaabay kulamo uu la yeelanayo xildhibaannada, siyaasiyiinta, iyo waxgaradka, isaga oo kala hadlayo xaaladda siyaasadeed ee dalka, ammaanka, iyo doorashooyinka soo socda.
Ujeedka ugu weyn ee kulamadan ayaa ah inuu Farmaajo u diyaar garowdo qorshaha cusub ee doorashada 2026, taas oo noqon doonta tallaabadii ugu horreysay ee uu qaado si uu uga qayb qaato tartanka siyaasadeed.
Kulankii ugu dambeeyay oo Jimcihii shalay dhacay ayaa Farmaajo wuxuu la yeeshay Xildhibaan Cabdiladiif Muuse Nuur (Sanyare), oo ka tirsan Golaha Shacabka Soomaaliya, laga soo doorto Puntland. Waxayna ka hadleen arrimo xasaasi ah oo ku saabsan doorashada 2026, amniga, iyo dagaalka argagixisada.
Xildhibaanka oo qoraal soo saaray ayaa xog ka bixiyay wada-hadalka uu la yeeshay Farmaajo, wuxuuna tilmaamay inay ku yimaadeen kulamo is-daba-joog ah oo ka dhacay Dooxa, ayna iska wareysteen qodobo muhiim ah, sida doorashada 2026, amniga, iyo dagaalka argagixisada.
“Kulama is-daba-joog ah oo aan yeelanay Madaxweynihii hore Farmaajo, intii aan ku sugnaa magaalada Doha, waxaan iska waraysanay xaaladaha dalka, arimaha siyaasada, amniga, la dagaalanka argagixisada Daacish &Al-Shabaab, midnimada dalka, iyo arimaha doorashooyinka 2026,” ayuu yiri Xildhibaan Cabdiladiif Muuse Nuur (Sanyare).
Sidoo kale, wuxuu intaasi sii raaciyay in qodobada ay ka wada-hadleen ay isku fahmeen, taas oo ka dhigan inay yeelanayaan iskaashi siyaasadeed oo cusub, ka hor doorashada.
Xildhibaanka ayaa sidoo kale u mahadceliyay Farmaajo iyo kooxdiisa, oo uu tilmaamay inay si weyn oo mugleh ay ugu soo dhaweeyeen magaalada Dooxa ee caasimada dalka Qatar.
“Dhamaan qodabadas oo dhan waxaan ka noqonay isku aragti, waxaan aad ugu mahadcelinaya Madaxweynihii hore Farmaajo iyo saaxiibadii kale igu soo dhaweeyay Doha, Qatar, intii aan joogay,” ayuu mar kale yiri xildhibaanku.
Farmaajo iyo diidmada qorshaha Villa Soomaaliya
Maxamed Cabdullaahi Farmajo ayaa ka mid ah madaxdii hore ee dalka iyo siyaasiyiinta sida wayn u diidan qorshaha Villa Soomaaliya ee ku aadan qabashada doorasho qof iyo cod ah, taas oo ay ka taagan tahay dood weyn oo u dhexeysa Xasan Sheekh iyo mucaaradka.
Marxalad siyaasadeed oo culus
Si kastaba, waxaa haatan dalka uu ku jiraa marxalad siyaasadeed oo aad u culus oo ku aadan khilaafka ka dhashay doorashada iyo mid kale oo ku aadan dagaalka Al-Shabaab, oo haatan xoogeystay, maadaama lagu arkay agagaarka Muqdisho iyo Shabeelooyinka.
📌 Wararka24 – Xog rasmi ah oo faahfaahin degdeg ah
