Taliska Ciidanka Xoogga Dalka ayaa cutubyo ka tirsan Kumaandooska Danab ka soo qaaday magaalada Kismaayo, si ay u xoojiyaan furimaha dagaalka ee ka furan gobolka Shabeellaha Dhexe.
Ciidamadan ayaa Axaddii laga qaaday Garoonka Diyaaradaha Sayid Maxamed Cabdulle Xasan ee Kismaayo, iyagoo u socda furimaha hore ee Hirshabelle, halkaas oo ay ka socdaan howlgallo ballaaran oo ka dhan ah Al-Shabaab.
Wararka ayaa sheegaya in ciidamadan lagu abaabulay xerada ay ku leeyihiin agagaarka garoonka Kismaayo ka hor inta aysan ka ambabixin. Kumaandooska Danab, oo uu Mareykanka tababaro, ayaa saldhig muhiim ah ku leh duleedka Kismaayo, halkaas oo laga hoggaamiyo howlgallada militari ee ka dhanka ah Al-Shabaab ee Jubbaland.
Saraakiisha Ciidanka Danab ayaa la fahamsan yahay in ay si dhow ula shaqeeyaan Militariga Mareykanka ee ku sugan Soomaaliya, kuwaas oo gacan ka siiya weerarrada cirka ee lagu beegsado horjoogeyaasha iyo maleeshiyaadka Al-Shabaab ee ku sugan Koonfurta iyo Bartamaha Soomaaliya.
Danab waa ciidan dhulka ah oo si gaar ah loogu carbiyay la dagaalanka Al-Shabaab, waana mid ka mid ah ciidamada ugu diyaarsan ee Soomaaliya ay leedahay ee ka jawaaba xaaladaha degdegga ah.
Dhanka kale, Muqdisho ayaa noqotay xudunta abaabulka ciidanka cusub ee loo dirayo aagagga dagaalka, si loo dardar geliyo gulufka ka dhanka ah Al-Shabaab ee ka socda Hirshabelle.
Saraakiisha Wasaaradda Gaashaandhigga ayaa sheegay in Dowladda Federaalka ay ka go’an tahay in kooxda laga ciribtiro guud ahaan gobolka, iyagoo xusay in ciidamo aad u tiro badan la daabulayo si aan loo hakrin howlgalka dib-u-xoreynta dalka. sida aankasoo xiganay wararka Universal
Madaxweynaha Hirshabelle, Cali Cabdullaahi Xuseen (Cali Guudlaawe), oo Axaddii kula hadlay ciidamada jiidda hore, ayaa ku hanjabay inaysan ogolaan doonin in Al-Shabaab ay gabaad ka dhigtaan dhulka Hirshabelle.
“Dagaalka aan kula jirno waa mid xaq u dirir ah, waxaana ku difaacnaynaa nafteena, maalkayaga iyo sharafkayaga,” ayuu yiri Madaxweynaha Hirshabelle, isagoo caddeeyay in dagaalku uu sii socon doono illaa laga xoreeyo gobolka.
Alshabaab ayaa shali laga burburiyey buundo ay dhawaan ka dhiseen hirshabeele taas muhiim u ahayd guud ahaan isku socod kooda iyo dhaqdaqaada militiry ee ay kawadaan dalka…