Muqdisho, Sept 28, 2025 (Wararka24) – Wasaarada Dekadaha iyo Gaadiidka Badda ee Soomaaliya ayaa ku dhawaaqday in dekadaha Muqdisho iyo Berbera loo aqoonsaday kuwa ugu waxqabadka wanaagsan Bariga Afrika sannadkii 2024, sida lagu sheegay warbixin cusub oo uu soo saaray halbeegga CPPI (Container Port Performance Index).
Warbixinta CPPI, oo ay si wadajir ah u diyaariyeen Bangiga Adduunka iyo Hay’adda Xog-uruurinta Suuqa Caalamiga ah, ayaa lagu qiimeeyay 407 dekadood oo caalami ah, oo ay ku jiraan 47 dekadood oo ku yaalla qaaradda Afrika.
Nidaamka qiimeynta ayaa lagu saleeyay waqtiga ay maraakibtu ku qaadato inay yimaadan dekedda iyo waqtiga uu kaga dhamaado dekada, taas oo si toos ah u muujinaysa heerka waxqabadka iyo hufnaanta dekedaha.
Sida lagu sheegay warbixinta ay Wasaarada soo saartay, dekadda Muqdisho ayaa ka gashay kaalinta koowaad ee Bariga Afrika iyo kaalinta 163-aad ee dekadaha adduunka oo dhan, halka dekadda Berbera ay gashay kaalinta labaad ee Bariga Afrika iyo kaalinta 243-aad ee caalamka. Tani waxay ka dhigan tahay in labada dekadood ay ka waxqabad wanaagsan yihiin dekedo ka fac weyn oo gobolka ku yaalla, isla markaana ay ka mid noqdeen dekedaha la tartami kara kuwa caalamka.
Wasaaradda Dekadaha iyo Gaadiidka Badda ayaa sheegtay in guushan ay ka dhalatay dadaallo ballaaran oo lagu hagaajinayo tayada adeegyada, maamulka nidaamyada shaqada iyo iskaashiga dowladda iyo ganacsatada.
Sidoo kale, waxaa lagu xusay in maalgashiga lagu sameeyay dekadda Muqdisho uu suurageliyay ballaarinta iyo casriyeynta adeegyada, iyadoo xarumo cusub oo terminal ah la hirgeliyay. Tallaabooyinkaas ayaa dekadda Muqdisho ka dhigay mid si buuxda uga qeyb qaadata tartanka dekedaha waaweyn ee qaaradda Afrika, sida Dekedda Saciid (Masar), Tangar (Marooko), Dakar (Senegal) iyo Toamasina (Madagascar).
“Dekedaha Soomaaliyeed waxay caddeeyeen in haddii la sameeyo maamul hufan iyo adeeg tayo leh ay awood u leeyihiin inay tartan la galaan dekedaha caalamka,” ayaa lagu yiri qoraal kasoo baxay wasaaradda.
Wasaaradda ayaa sidoo kale bogaadisay maamulka dekedaha iyo shirkadaha gaarka loo leeyahay ee door weyn ka qaatay horumarinta adeegyada iyo xoojinta kaabeyaasha ganacsiga. Waxaa lagu tilmaamay in dekeduhu yihiin laf-dhabarta horumarka, isla markaana ay gacan ka geystaan kobcinta dhaqaalaha iyo fursadaha ganacsi ee dalka.
