Washington – Wararka24: Dacwadda u dhaxaysa dhaxal-sugaha Sacuudi Carabiya, Mohammed Bin Salmaan (MBS), iyo sarkaalkii hore ee sirdoonka boqortooyada, Saad Aljabri, ayaa gashay wajigii cusub, kaddib markii Aljabri uu codsi rasmi ah u gudbiyay maxkamad federaali ah oo ku taalla gobolka Virginia ee dalka Maraykanka.
Saad Aljabri, oo muddo dheer u ahaa gacan-yare dhow ee dhaxal-sugihii hore Mohammed Bin Nayef, ayaa lagu eedeeyay inuu lunsaday lacag gaaraysa $5 bilyan oo dollar-ka Mareykanka ah xilli uu ahaa mas’uul amni sare ah.
Iyada ooy Shirkadda dawladdu leedahay ee Sakab ayaa dacwad ka dhan ah ku furtay isaga balse Aljabri ayaa ku dooday in eedeymahaasi yihiin kuwo siyaasadeysan, isla markaana uu lacagtaas u adeegsaday hawlgallo sirdoon oo qarsoodi ah oo la xiriira dagaalka ka dhanka ah argagixisada.
Kiiskan ayaa si dhow ugu xiran loollankii siyaasadeed ee u dhaxeeyay Bin Salmaan iyo Bin Nayef, kaas oo lumiyay xilkii dhaxal-sugaha boqortooyada intii lagu jiray afgambigii siyaasadeed ee 2017.
Aljabri ayaa isla sanadkaa ka cararay Sacuudi Carabiya, isagoo sheegay in noloshiisa khatar gashay kaddib markii la xiray laba carruurtiis ah si loogu qasbo inuu ku soo laabto dalka.
Qareennada Aljabri ayaa dacwadda ku tilmaamay qayb ka mid ah olole cadaadis siyaasadeed oo uu hoggaaminayo Bin Salmaan, iyagoo arrinta ku barbar dhigay dilkii 2018 ee weriye Jamal Khashoggi, oo warbixinta sirdoon oo Maraykanka lagu sheegay inuu MBS oggolaaday dilka. Dowladda Sacuudiga ayaa si adag u beenisay eedeymahaas.
Dowladda Maraykanka ayaa hore ugu faragelisay dacwado la mid ah, iyadoo adeegsatay awoodda “mudnaanta siraha dowladda” si looga hortago in la shaaciyo xog amni oo xasaasi ah.
Talaabadaas ayaa horay u joojisay kiisaskii hore ee Aljabri, balse kiiskan cusub ayaa dib u iftiimiyay murankii u dhaxeeya labada dhinac.
Khabiirada sharciga ayaa tilmaamay in aanay u badnayn in maxkamad Maraykan ah aqbasho codsiga Aljabri ee ah in saraakiil hore oo Maraykan ah lagu qasbo inay difaacaan dacwadiisa, maadaama xogta la dalbanayo loo arko mid amni qaran ah oo aad u xasaasi ah.
Kiiskan ayaa loo arkaa mid muujinaya awoodda siyaasadeed ee Bin Salmaan iyo sida uu u adeegsado hay’adaha dawladdu si uu u difaaco danaha boqortooyada,
Halka dadka dhaliila nidaamkan ay ku tilmaamayaan tusaale cad oo muujinaya sida cadaadis iyo cabburin loogu adeegsado awoodda siyaasadeed.
