Arday dhallinyaro ah oo horay uga gudbay imtixaanka dowladda ayaa Isniintii lagu dilay magaalada Muqdisho. Dilkan ayaa ka dhashay khilaaf dhex maray laba askari oo ciidamada dowladda Soomaaliya ka tirsan.
Marxuumka Cali Sheekh Cumar ayaa ku geeriyooday rasaas ay isku fureen laba askari ee isku dhacay, isaga oo meeshaas maray waqti ay labada askari is dagaalayeen goobtas uu marayey wiilka. Qoyskiisu ayaa cadeeyey in wiilku ahaa arday aad ugu dadaalaya waxbarashadiisa.
Aabbaha Cali ayaa sheegay in wiilkiisu uu ahaa qof edeb leh oo aan waligii wax khaldan samayn. Wuxuu intaa ku daray in Cali uu u socday dugsigii waxbarashada markii uu ku dhintay dhacdadaas.
Qoyska marxuumka ayaa dowladda Soomaaliya ka codsaday cadaalad. Waxay sheegeen in aan wiilkooda la aasi doonin oo lala sugi doono ilaa laga helo qofka geystay dembiga.
Gabar ladhalatay Cali ayaa tidhi cadaalad ayaan u baahanahay qofka dilay walalkey si waafaqsan sharciga Ilaahey.
Maamulka dugsiga Jaabir Bin Xayaan ayaa xaqiijiyay in Cali uu ka mid ahaa ardayda ugu fiican dugsiga. Wuxuu sheegay in marxuumku uu noqon jiray mid ka mid ah kuwa hore u gala imtixaannada dowladda.
Maamulaha dugsiga ayaa yiri Cali wuxuu ahaa arday kaalinta koowaad ka geli jiray dugsiga una ahaa kuwa ugu akhlaaqsan.
Booliska Muqdisho ayaa bilaabay baaritaan ku saabsan dilka ardayga. Qoyska ayaa sugaya in cadaalad laga gaadho dhacdadan.
