Wararka24: 16-02-2026; Dowladda Australia ayaa lagu eedeeyay inay waddo qorshe sir ah oo lagu xaddidayo ama lagu joojinayo socdaalka dadka ka imanaya 37 gobol oo ku yaalla 13 dal, kuwaas oo ay ka mid yihiin Soomaaliya, Nayjeeriya, Masar iyo Falastiin (Gaza), sida ay werisay The Guardian Australia.
Qorshahan oo la sheegay in lagu magacaabo “Fortress Australia” ayaa lagu saleeyay eedeymo ah in gobollo ka mid ah dalalkaas ay gacanta ku hayaan kooxo xagjir ah, taasoo, sida qorshaha ku xusan, adkeynaysa hubinta amniga dadka ka imanaya meelahaas.
Arrintan awgeed, waxaa la soo jeediyay in si guud loo xakameeyo ama loo mamnuuco socdaalka dadka ka imanaya gobolladaas.
Wararka la dusiyay ayaa sidoo kale tilmaamaya in qorshuhu ku jiro yareynta tirada muhaajiriinta sannadkii la qaato, iyo in la adkeeyo tallaabooyinka ka dhanka ah magangalyo-doon iyo arday ajaanib ah.
Hoggaamiyaha cusub ee mucaaradka Australia, Angus Taylor, ayaa sheegay inuusan arkin qorshaha la faafiyay, balse muujiyay mowqif adag oo ku aaddan siyaasadda socdaalka, isaga oo carrabka ku adkeeyay in dadka imanaya Australia ay waajib ku tahay inay ixtiraamaan qiyamka iyo dimuqraadiyadda dalkaas.
Haddii la hirgeliyo, qorshahan ayaa si weyn u saameyn kara qoysaska Soomaaliyeed iyo jaaliyadaha kale ee Geeska Afrika, maadaama uu adkeyn karo mideynta qoysaska, fiisooyinka ardayda iyo fursadaha shaqo.
Ilaa hadda, wax go’aan rasmi ah lagama gaarin, balse wararkan la dusiyay ayaa kiciyay dood ballaaran oo ku saabsan siyaasadda socdaalka ee Australia.
