Afhayeenka ciidanka booliska Soomaaliyeed, Cabdifitaax Aadan Xasan, ayaa shir jaraa’id ku qabtay magaalada Muqdisho, isagoo ka warbixiyay dhacdadii shalay ee ka dhacday isgoyska Afarta Darjiin, kaas oo sababtay dilka wiil Bajaajle ah iyo gubida gaari ay lahaayeen ciidamada booliska.
Ugu horreyn, wuxuu xaqiijiyay in gacanta lagu soo dhigay askarigii ka damebeeyay falkaasi oo ka tirsan ciidanka Taraafikada. Afhayeenku wuxuu sheegay in askarigaasi uu ku xiran yahay xarunta dambi baariska ee C.I.D, isaga oo la horgeyn doono maxkamadda ku shaqaysa.
“Waxaan rabaa inaan shacabka Soomaaliyeed u xaqiijiyo in dil uu ka dhacay isgoyska Afarta Darjiin, kaas oo uu gaystay eedeysane ka tirsan ciidanka nabad-gelyada waddooyinka, gaar ahaan Taraafiko. Eedeysanahaas waxaa gacanta ku haya ciidanka booliska Soomaaliyeed, waxaana ku socota baaris, si cadaaladda loo horgeeyo,” ayuu yiri Afhayeenka ciidanka
Sidoo kale, wuxuu tilmaamay in booliska Soomaaliyeed uu ku raad-joogo shaqsiyaad uu sheegay inay ka dhex faa’iideysteen shaqaaqada, isla markaana gubay mid ka mid ah gawaarida ciidanka booliska oo shalay lagu burburiyay goobta, kadibna dab la qabad-siiyay.
Waxaa kale oo uu hoosta ka xariiqay in, haddii lasoo qabto dadkaasi, lasoo taagi doono maxkamad si loogu qaado faldambiyeedka ay galeen.
“Taliska ciidanka boliska Soomaaliyeed wuxuu ku raad-joogaa eedeysanayaal kusoo dhex dhuuntay goobta uu dilka ka dhacay xilliga ay saxmadda socotay, kuwaas oo si bareer ah u burburiyay gaari uu lahaa booliska Soomaaliyeed oo ah hanti dadweyne, kaas oo ay si bareer ah u burburiyeen, kadibna ay dab qabad-siiyeen,” ayuu markale yiri.
Afhayeenka ciidanka booliska ayaa intaasi ku daray in qof kasta oo dambiga uu gaysto isaga lagula xisaabtami doono, wuxuuna falalka noocaan ah uga digay muwaadiniinta Soomaaliyeed.
“Bulshada Soomaaliyeed waxaan sidoo kale ku wargelinayaa shaqsi kasta oo ah muwaadin Soomaaliyeed dambiga uu gaysto inuu isaga masuul ka yahay,” ayuu raaciyay.
Falkan wuxuu daba socday dilka wiil Bajaajle ahaa oo si bareer ah uu askari ka tirsan Taraafikada ugu gaystay Afarta Darjiin. Waxaa kadib dib-u-dhigay Bajaaleyda iyo shaca careysan oo isugu soo baxay halkaasi, kadibna waxay isku dhaceen booliska.
Dhacdooyinkan ayaa soo noq-noqday, waxaana marar badan darawallada Bajaajleyda oo u badan dhalinyaro siyaabo kala duwan loogu dilay gudaha magaalada Muqdisho.
📌 Wararka24 – Xog rasmi ah oo faahfaahin degdeg ah
