Wararka24: Guddiga Madaxa-bannaan ee Xuquuqul Insaanka Qaranka Soomaaliyeed (GMXIQ) ayaa si adag u cambaareeyay dilal lagu bartilmaameedsaday dad rayid ah oo ka dhacay deegaanka Ari-Caddeeye ee gobolka Sool iyo rabshado ka dhacay degmada Jalalaqsi ee gobolka Hiiraan.
War-saxaafadeed uu guddigu soo saaray ayaa lagu sheegay in ugu yaraan 21 qof oo rayid ah, oo ay ku jiraan carruur iyo dad waayeel ah, lagu dilay weerarka ka dhacay Ari-Caddeeye.
Sidoo kale, guddigu wuxuu sheegay in rabshadihii ka dhacay degmada Jalalaqsi ay sababeen dhimashada ugu yaraan 10 qof, iyadoo la gubay guryo ay lahaayeen dad rayid ah.
GMXIQ ayaa muujiyay walaac xooggan oo ku saabsan beegsiga dadka rayidka ah, burburinta hantidooda, barakaca qoysaska iyo saameynta bani’aadannimo ee ka dhalatay dhacdooyinkan.
Guddigu wuxuu sheegay inuu sameeyay qiimeyn hordhac ah oo ku saabsan labada dhacdo, isla markaana uu sii wadi doono la socodka xaaladda iyo wada-shaqeynta hay’adaha ay khusayso.
War-saxaafadeedka ayaa ugu baaqay dhammaan dhinacyada ku lugta leh colaadaha inay si degdeg ah u joojiyaan rabshadaha, muujiyaan isxakameyn, isla markaana ilaaliyaan dadka rayidka ah iyo hantidooda, iyagoo u hoggaansamaya Dastuurka Soomaaliya iyo shuruucda caalamiga ah ee xuquuqda aadanaha.
Guddiga ayaa sidoo kale ugu baaqay hay’adaha awoodda u leh Maamul Goboleedka Waqooyi Bari inay sameeyaan baaritaanno madax-bannaan oo hufan si loo xaqiijiyo isla xisaabtan, loogana jawaabo baahiyaha bani’aadannimo ee qoysaska ay saameeyeen rabshaduhu.
Waxaa sidoo kale loogu baaqay odayaasha dhaqanka, culimada, haweenka, dhallinyarada iyo hoggaamiyeyaasha bulshada inay xoojiyaan dadaallada lagu dejinayo xiisadaha, laguna dhiirrigelinayo wada-hadal iyo dib-u-heshiisiin.
Guddiga Madaxa-bannaan ee Xuquuqul Insaanka Qaranka Soomaaliyeed ayaa ugu dambeyn tacsi u diray qoysaska ay ka geeriyoodeen dhibbanayaasha, wuxuuna caafimaad degdeg ah u rajeeyay dadka dhaawacmay, isagoo adkeeyay sida ay uga go’an tahay ilaalinta xuquuqda aadanaha iyo horumarinta nabadda Soomaaliya.
