Wararka24: Wasaaradda Qoyska iyo Horumarinta Xuquuqul Insaanka ee Dowladda Federaalka Soomaaliya ayaa si rasmi ah u magacawday Golaha Haweenka Qaranka Soomaaliyeed, iyadoo sheegtay in tallaabadan lagu xoojinayo ka qaybgalka haweenka ee hoggaaminta, siyaasadda iyo horumarinta dalka.
Warsaxaafadeed ay soo saartay wasaaraddu ayaa lagu sheegay in magacaabista golaha ay ku saleysan tahay qodobbada Dastuurka Federaalka Soomaaliya iyo xeerarka nidaamka xukuumadda, kuwaas oo taageeraya sinnaanta, ilaalinta xuquuqda aadanaha iyo ka qaybgalka muwaadiniinta.
Wasaaraddu waxay sheegtay in Golaha Haweenka Qaranka Soomaaliyeed uu noqon doono gole qaran oo talo-bixin, isku-duwid iyo matalaad u ah haweenka, isla markaana si dhow ula shaqeyn doona Wasaaradda Qoyska iyo Horumarinta Xuquuqul Insaanka.
Sidoo kale, waxaa lagu sheegay in golahan uu door ka qaadan doono horumarinta siyaasadaha, istiraatiijiyadaha iyo barnaamijyada lagu xoojinayo sinnaanta jinsiga iyo ka qaybgalka haweenka ee dhinacyada siyaasadda, bulshada iyo dhaqaalaha.
Golaha cusub ayaa ka kooban 10 xubnood oo lagu soo xulay aqoontooda, kartidooda iyo waayo-aragnimadooda. Guddoomiyaha Golaha waxaa loo magacaabay Naciimo Ibraahim Yuusuf, Guddoomiye Ku-xigeenna waxaa loo magacaabay Faaiza Cali Boolaay, halka Aamina Axmed Samatar loo magacaabay Xoghayaha Guud.
Xubnaha kale ee Golaha Haweenka Qaranka Soomaaliyeed ayaa kala ah Maryan Taqal Xuseen, Aamina Axmed Cali, Caasho Maxamed Caraaye, Nuurto Aadan Xasan, Fadumo Aadan Cusmaan, Ayaan Saciid Tukaale iyo Sacdiyo Cabdiraxmaan Xuseen.
