Wararka24: Siyaasiyiin ka tirsan mucaaradka Soomaaliya ayaa si adag uga fal-celiyay xukunka saddexda sano ee xabsiga ah ee maanta lagu riday Sacdiyo Macalin Cali Xasan, oo loo yaqaan Sacdiya Bajaaj, kadib go’aan ay soo saartay Maxkamadda Gobolka Banaadir.
Maxkamaddu waxay sheegtay in Sacdiyo lagu helay eedeymo la xiriira kicin dadweyne iyo sumcad dil lagu sheegay inay u geysatay hay’adaha iyo madaxda Dowladda Federaalka Soomaaliya. Xukunka ayaa yimid kadib dhowr fadhi oo maxkamadeed oo kiiska loo qabtay.
Madaxweynihii hore ee Soomaaliya, Sheikh Sharif Sheikh Ahmed, ayaa ku tilmaamay xukunka mid aan caddaalad ahayn. Wuxuu sheegay in go’aankaasi uu dirayo fariin cabsi gelin ah oo ku wajahan dhalinyarada iyo dadka dhaliila dowladda.
Sheekh Shariif ayaa sidoo kale ku eedeeyay dowladda inay beegsaneyso dadka danyarta ah iyo kuwa aragtidooda si furan u cabbira. Wuxuu shacabka ugu baaqay inay ka hortagaan waxa uu ku tilmaamay dulmi iyo cadaalad darro.
Dhankiisa, Ra’iisul Wasaarihii hore ee Soomaaliya, Hassan Ali Khaire, ayaa sheegay in Sacdiyo ay tahay hooyo u halgameysay nolosha qoyskeeda, isla markaana aan loo arkin dambiile. Wuxuu ku dooday in xukunka lagu riday uu dhaawacayo kalsoonida shacabka ee garsoorka.
Khayre ayaa sidoo kale sheegay in muwaadiniintu ay xaq dastuuri ah u leeyihiin inay si nabad ah u muujiyaan aragtidooda, isagoo ku tilmaamay xarigga Sacdiyo mid cabsi gelin ku ah dadka doonaya inay ka hadlaan arrimaha bulshada iyo dowladda.
Dhinaca kale, dowladda iyo hay’adaha garsoorka ayaan weli ka jawaabin eedeymaha mucaaradka ee la xiriira xukunka. Maxkamadda Gobolka Banaadir ayaa hore u sheegtay in Sacdiyo ay xaq u leedahay inay racfaan ka qaadato go’aanka lagu riday.
Sacdiyo Macalin Cali ayaa muddo ka badan laba bilood ku xirneyd Muqdisho, waxaana kiiskeeda si weyn ula socday bulshada Soomaaliyeed, gaar ahaan dadka isticmaala baraha bulshada iyo kooxaha u dooda xuquuqda muwaadiniinta.
