Wararka24: Xildhibaan ka tirsan Baarlamaanka Federaalka Soomaaliya, Xasan Yare, ayaa shaaca ka qaaday in doorashada madaxtinimada dalka mar kale lagu qaban doono Teendhada Afisyooni, xilli uu weli taagan yahay khilaafka siyaasadeed ee ku saabsan hannaanka doorashooyinka.
Xildhibaan Xasan Yare oo wareysi siiyay Somali Cable Tv ayaa sheegay in aan la isku diidaneyn goobta doorashada, balse la isku hayo habka loo wajahayo iyo qaabka loo marayo. Wuxuu tilmaamay in Teendhada Afisyooni ay weli tahay goob la isla oggol yahay.
“Teendhada la’iskuma diidano ee qaabka loo aadaayo ayaa la’isku haystaa mooyaane teendho waa la aadayaa,” ayuu yiri xildhibaanku, isaga oo caddeeyay in khilaafku yahay mid farsamo iyo siyaasadeed oo ku saabsan nidaamka.
Sidoo kale, wuxuu xusay in Baarlamaanka Federaalka uu doorashada ku go’aamin doono codadka xildhibaannada, isagoo tilmaamay in tirada guud ee 329 xildhibaan ay codeyn doonaan marka waqtigu la gaaro.
Hadalkan ayaa kusoo aadaya xilli ay sii xoogeysanayaan doodo la xiriira doorashooyinka dalka, iyadoo aan weli la isla meel dhigin habka rasmiga ah ee loo qabanayo, taasoo dhalisay walaac ku saabsan xasilloonida siyaasadeed.
Xildhibaan Xasan Yare ayaa arrimahan ka hadlay xilli uu ka qeyb galay munaasabad dhaqameed ka dhacday Mogadishu, taas oo lagu caleemo saaray Ugaaska beesha Murusade, Ugaas Cabdirisaaq Ugaas Cabdullaahi.
Munaasabadda ayaa waxaa kasoo qeyb galay madax iyo siyaasiyiin kala duwan oo ay ku jiraan Sheikh Sharif Sheikh Ahmed iyo Hassan Ali Khaire, kuwaas oo xusay muhiimadda dhaqanka iyo midnimada bulshada Soomaaliyeed.
Hadallada kasoo baxay xildhibaanka ayaa muujinaya in weli ay socdaan dadaallo lagu doonayo in xal looga gaaro khilaafka doorashooyinka, iyadoo Teendhada Afisyooni mar kale noqotay goob la filayo in lagu go’aamiyo hoggaanka dalka.
DAAWO
