Wararka24: Xoghayaha Guud ee Qaramada Midoobay, António Guterres, ayaa magacaabay Maxamed Yahya inuu noqdo Kaaliyaha Xoghayaha Guud ee Arrimaha Bani’aadannimada iyo Ku-xigeenka Isku-duwaha Gurmadka Degdegga ah ee xafiiska OCHA.
Maxamed Yahya ayaa xilkan kala wareegaya Joyce Msuya oo u dhalatay Tanzania, iyadoo Qaramada Midoobay ay uga mahadcelisay doorkeedii iyo adeeggeedii muddada dheer ee dhinaca gargaarka bani’aadannimada.
Mas’uulkan cusub ayaa leh in ka badan labaatan sano oo waayo-aragnimo ah oo ku saabsan horumarinta, gargaarka bani’aadannimada iyo nabad-dhisidda. Waxa uu kasoo shaqeeyay heerar kala duwan oo Qaramada Midoobay ah, isagoo khibrad ka soo kasbaday Afrika iyo Koonfurta Aasiya.
Maxamed Yahya ayaa hadda ah Isku-duwaha Joogtada ah iyo Isku-duwaha Arrimaha Bani’aadannimada ee Qaramada Midoobay ee Pakistan, halkaas oo uu hoggaamiyo mid ka mid ah howlgalada ugu waaweyn ee hay’adda ee gobolka Aasiya iyo Baasifigga.
Waxa uu door muuqda ka qaatay isku-duwidda jawaabta Qaramada Midoobay ee fatahaadihii ka dhacay Pakistan sanadkii 2025, kuwaas oo saameyn weyn ku yeeshay malaayiin qof.
Ka hor magacaabistiisa Pakistan, Maxamed Yahya waxa uu ahaa Wakiilka UNDP ee Nigeria, isagoo maamulayay mid ka mid ah xafiisyada ugu waaweyn ee hay’addaasi ku leedahay caalamka. Waxa kale oo uu hoggaamiyay Barnaamijka Gobolka Afrika ee UNDP, isaga oo si dhow ula shaqeeyay Midowga Afrika si loo xoojiyo dadaallada ka hortagga colaadaha iyo xasilinta dalalka qaaradda.
Magacaabistan ayaa loo arkaa guul diblomaasiyadeed oo muhiim ah, maadaama ay sare u qaadayso matalaadda Soomaaliyeed ee hay’adaha ugu sarreeya ee Qaramada Midoobay, isla markaana muujinayso doorka sii kordhaya ee khubarada Soomaaliyeed ku leeyihiin arrimaha caalamiga ah.
