Wararka24: Soomaaliya ayaa si rasmi ah ugu biirtay Golaha Nabadda iyo Ammaanka ee Midowga Afrika, taasoo markii ugu horreysay dhacaysa tan iyo aasaaska golahan sanadkii 2003.
Safiirka Soomaaliya u fadhiya Itoobiya iyo Midowga Afrika, Cabdullaahi Warfaa, ayaa ka taagay calanka Soomaaliya xarunta golaha, taas oo muujinaysa bilaabashada waajibaadka cusub ee dalka muddada 2026 ilaa 2028.
Mas’uuliyiinta dowladda ayaa tallaabadan ku tilmaamay guul diblomaasiyadeed oo muhiim ah, taas oo kor u qaadaysa sumcadda iyo doorka Soomaaliya ee arrimaha nabadda iyo ammaanka qaaradda Afrika.
Safiirka ayaa sheegay in xubinnimadani ay sare u qaadeyso codka Soomaaliya ee ku aaddan dejinta ajandaha nabadda iyo ammaanka Afrika.
Soomaaliya ayaa loo doortay kursigan bishii Febraayo 2026, iyadoo ka mid noqon doonta 15-ka xubnood ee golaha.
Inta ay xubinta ka tahay, Soomaaliya ayaa ka qeyb qaadan doonta ka hortagga khilaafaadka, nabad-dhisidda, la dagaallanka argagixisada iyo taageeridda dib-u-soo kabashada dalalka colaadaha kasoo kabanaya.
Golaha Nabadda iyo Ammaanka ee Midowga Afrika ayaa ah hay’adda ugu sareysa ee go’aan qaadashada ee AU ee ka shaqeysa xallinta khilaafaadka iyo sugidda nabadda.
Tallaabadan ayaa kusoo aadeysa xilli Soomaaliya ay sii xoojinayso dadaalladeeda gudaha ee dhinaca amniga iyo dib-u-dhiska hay’adaha dowladda.
