Wararka24: Mas’uuliyiinta wasaaradaha arrimaha dibadda ee Soomaaliya iyo Pakistan ayaa yeeshay wada-hadal khadka taleefoonka ah oo diiradda lagu saaray xaaladda muwaadiniin Pakistan u dhashay oo saaran markabka MT Honour 25, kaas oo lagu hayo xeebaha Puntland kadib afduub loo geystay.
Wasiirka Arrimaha Dibadda Soomaaliya, Cabdisalaan Cali, iyo Ra’iisul Wasaare Ku-xigeenka ahna Wasiirka Arrimaha Dibadda Pakistan, Senator Mohammad Ishaq Dar, ayaa ka wada hadlay dadaallada lagu doonayo in lagu xaqiijiyo badqabka iyo sii deynta shaqaalaha saaran markabka. Labada dhinac ayaa isla falanqeeyay xaaladda amni ee ku xeeran afduubka iyo tallaabooyinka suurtagalka ah ee lagu xallin karo.
Dowladda Soomaaliya ayaa muujisay inay ka go’an tahay taageeridda dadaallada lagu badbaadinayo dadka la haysto. Mas’uuliyiinta Soomaaliya ayaa sheegay inay la shaqeyn doonaan dhinacyada ay khusayso si loo gaaro xal nabadeed oo horseeda sii deynta muwaadiniinta lagu haysto markabka.
Labada wasiir ayaa sidoo kale isku raacay in la sii xoojiyo xiriirka iyo wada shaqeynta joogtada ah ee u dhaxeysa labada dowladood inta laga gaarayo xal kama dambeys ah oo ku saabsan arrintan. Waxay carrabka ku adkeeyeen muhiimadda iskaashiga diblomaasiyadeed iyo amni ee labada dal.
Intii uu socday wada-hadalka, Soomaaliya iyo Pakistan ayaa muujiyay sida ay ugu qanacsan yihiin heerka xiriirka labada dal. Waxay sheegeen inay sii xoojin doonaan iskaashiga dhinacyada kala duwan, gaar ahaan arrimaha amniga, diblomaasiyadda iyo danaha wadaagga ah.
Afduubyada maraakiibta ganacsiga ayaa dib usoo muuqday bilihii u dambeeyay xeebaha Soomaaliya. Bishii April waxaa la afduubtay dhowr markab oo ganacsi, kuwaas oo qaarkood loo jiheeyay xeebaha Puntland kadib markii ay qabsadeen kooxo hubeysan oo lala xiriiriyay burcadbadeed.
Khubaro amni ayaa aaminsan in dib usoo laabashada falalka burcadbadeedda ay xiriir la leedahay isbeddellada amni ee gobolka iyo mashquulka ka dhashay xiisadaha ka jira Bariga Dhexe. Arrintan ayaa sare u qaadday walaaca ku saabsan amniga marin-biyoodka muhiimka ah ee maraakiibta caalamiga ah isticmaalaan.
