Wararka24: Hay’adaha caalamiga ah ee Qaramada Midoobay iyo Urur-Goboleedka IGAD ayaa walaac xooggan ka muujiyay dagaallada iyo rabshadaha ka socda magaalada Muqdisho, iyagoo ugu baaqay dhammaan dhinacyada siyaasadda Soomaaliya inay si degdeg ah u joojiyaan colaadda una laabtaan wada-hadal.
Qoraal kasoo baxay UNTMIS ayaa lagu sheegay in hay’addu si weyn uga walaacsan tahay xaaladda amni ee ka taagan caasimadda. Waxay ugu baaqday dhinacyada isku haya khilaafka inay muujiyaan hoggaan mas’uuliyadeed leh, kana fogaadaan tallaabo kasta oo khatar gelin karta nolosha shacabka rayidka ah iyo xasilloonida dalka.
Hay’addu waxay sidoo kale xustay casharradii laga bartay qalalaasihii siyaasadeed ee sanadkii 2021, markii murannada siyaasadeed ay sababeen amni-darro iyo kala qaybsanaan. UNTMIS ayaa ka digtay in aan mar kale lagu noqon xaalado la mid ah kuwii hore, iyadoo ku baaqday in mudnaanta la siiyo xal nabadeed iyo is-afgarad siyaasadeed.
Dhanka kale, IGAD ayaa cambaareysay rabshadaha laga soo wariyay Muqdisho, waxayna ku baaqday in si degdeg ah loo dejiyo xaaladda. Urur-goboleedku wuxuu carrabka ku adkeeyay in nabadda, midnimada qaranka iyo xasilloonida Soomaaliya ay yihiin arrimo muhiim ah oo aan loo oggolaan karin inay halis galaan.
Xoghayaha Fulinta IGAD, Workneh Gebeyehu, ayaa sheegay in dhammaan daneeyayaasha Soomaaliyeed looga baahan yahay inay danta shacabka ka hormariyaan khilaafaadka siyaasadeed, isla markaana ay adeegsadaan wada-hadal iyo hannaan nabadeed oo lagu xalliyo kala aragti duwanaanshaha jira.
Labada hay’adood ayaa sidoo kale muujiyay inay diyaar u yihiin taageeridda dadaallada lagu xoojinayo wada-hadalka, dib-u-heshiisiinta iyo xasilloonida Soomaaliya. Waxay sheegeen in sii socoshada rabshadaha ay saameyn ku yeelan karto shacabka, amniga iyo horumarka dalka.
Baaqyadan ayaa kusoo aadaya xilli ay sii kordhayaan walaacyada gudaha iyo kuwa caalamiga ah ee ku saabsan xaaladda amni iyo siyaasadeed ee Muqdisho, iyadoo dadaallo kala duwan lagu doonayo in lagu qaboojiyo xiisadaha taagan.
