Wararka24: Wasiiru Dowlaha Wasaaradda Gaashaandhigga Soomaaliya, Cumar Cali Cabdi, ayaa eedeymo u jeediyay Madaxweynaha Puntland, Siciid Cabdullaahi Deni, isaga oo dhaliilay siyaasadaha maamulka Puntland iyo xiriirka uu la leeyahay Dowladda Federaalka Soomaaliya.
Wareysi uu siiyay warbaahinta gudaha, wasiirka ayaa sheegay in tiro badan oo dhalinyaro ah oo ka soo jeeda Puntland ay tahriibeen, halka kuwo kalena ay u soo guureen magaalada Muqdisho si ay uga raadsadaan fursado shaqo iyo nololeed.
Wasiirka ayaa sidoo kale ku eedeeyay Madaxweynaha Puntland inuu hor istaagay qaar kamid ah adeegyada iyo barnaamijyada dowladda federaalka, isagoo tusaale u soo qaatay arrimaha la xiriira aqoonsiga qaranka iyo barnaamijyada loogu talagalay dhalinyarada.
Cumar Cali Cabdi ayaa sheegay in Puntland ay marar badan ka hor timid qorshayaal iyo mashaariic ay wadday Dowladda Federaalka Soomaaliya, isaga oo ku dooday in arrintaasi saameyn ku yeelatay wada-shaqeynta labada dhinac.
Sidoo kale, wasiirka ayaa dib u xusay muranno hore oo dhex maray dowladda federaalka iyo Puntland, kuwaas oo ay kamid tahay khilaafkii ka dhashay markab hub sida oo lagu qabtay xeebaha Puntland sanadihii la soo dhaafay.
Hadalladan ayaa kusoo aadaya xilli uu weli taagan yahay khilaafka siyaasadeed ee u dhexeeya Dowladda Federaalka Soomaaliya iyo Puntland, kaas oo salka ku haya arrimo la xiriira dastuurka, doorashooyinka iyo awood-qaybsiga dalka.
Maamulka Puntland ayaan weli si rasmi ah uga jawaabin eedeymaha uu jeediyay Wasiiru Dowlaha Wasaaradda Gaashaandhigga Soomaaliya, waxaana la sugayaa haddii ay ka soo saaraan wax war ah oo ku saabsan hadalladaasi.
