Wararka24: Madaxweyne Ku xigeenka Dowlad goboleedka Puntland, Ilyaas Cismaan Lugatoor, ayaa sheegay in Puntland ay garab taagan tahay maamulka Galmudug xilli ay jiraan xiisado siyaasadeed oo la xiriira doorashooyinka maamulkaasi.
Lugatoor oo ka hadlay xaaladda Galmudug ayaa sheegay in labada maamul ay yihiin deris xiriir dhow leh, isla markaana xasilloonida iyo amniga Galmudug ay muhiim u tahay Puntland. Wuxuu xusay in Puntland ay danaynayso in Galmudug ay sii ahaato mid degan oo mideysan.
Madaxweyne Ku xigeenka Puntland ayaa sidoo kale sheegay in ciidamada qaarkood laga soo raray furimaha dagaalka si loogu xoojiyo amniga gudaha, isaga oo ku dooday in xaaladda siyaasadeed ee taagan ay keentay dhaq-dhaqaaqyo cusub oo dhinaca amniga ah.
Wuxuu ugu baaqay shacabka iyo siyaasiyiinta Galmudug inay ka shaqeeyaan ilaalinta wadajirka iyo xasilloonida maamulka, isaga oo sheegay in xal kasta lagu gaari karo wada-hadal iyo is-afgarad siyaasadeed.
Sidoo kale, Lugatoor ayaa caddeeyay in Puntland ay taageero u fidin doonto dadaallada lagu ilaalinayo nabadda iyo midnimada Galmudug, isaga oo ku baaqay in laga fogaado tallaabo kasta oo horseedi karta khilaaf ama qalalaase cusub.
Hadalkan ayaa kusoo aadaya xilli ay isa soo tarayaan wararka ku saabsan khilaaf siyaasadeed oo la xiriira doorashada soo socota ee Galmudug, kaas oo la sheegay inuu u dhexeeyo madaxda maamulka iyo Dowladda Federaalka Soomaaliya.
Daawo
