Wararka24: Xaaladda guud ee deegaannada Galmudug ayaa lagu soo warramayaa inay tahay mid deggan, kadib warar saacadihii lasoo dhaafay la isla dhex marayay oo ku saabsanaa dhaq-dhaqaaqyo ciidan iyo xaalado amni oo ka jira magaalada Dhusamareb.
Ilo xog-ogaal ah oo ku sugan Dhuusamareeb ayaa sheegay in aysan jirin ciidamo dheeraad ah oo la geeyay magaalada, isla markaana xaaladda amniga ay tahay mid caadi ah.
Wararka ayaa intaas ku daraya in ammaanka magaalada ay si wadajir ah u sugayaan ciidamada heer federaal iyo kuwa maamulka Galmudug, iyadoo aysan jirin wax xiisad ah oo laga dareemayo gudaha magaalada.
Sidoo kale, waxaa Dhuusamareeb ku sugan madaxweynaha Galmudug Axmed Cabdi Kaariye (Qoorqoor), kaas oo sii wada howlaha maamulka iyo kulamada siyaasadeed ee la xiriira doorashooyinka soo socda.
Dhanka kale, magaalada iyo guud ahaan deegaannada Galmudug waxaa ka socda dhaq-dhaqaaqyo siyaasadeed oo ku saabsan doorashooyinka maamulkaasi. Musharixiin dhowr ah ayaa bilaabay kulamo iyo ololeyaal ay taageero uga raadinayaan bulshada iyo siyaasiyiinta deegaanka.
Sida jadwalku yahay, doorashada Galmudug ayaa la qorsheeyay inay qabsoonto 20-ka June 2026, markaas oo la qaban doono doorashada golayaasha deegaanka iyo xubnaha baarlamaanka dowlad-goboleedka.
Jadwalka ayaa sidoo kale muujinaya in doorashada guddoonka baarlamaanka Galmudug la qaban doono 2-da July, halka doorashada madaxweynaha maamulkaasi loo asteeyay 9-ka July 2026.
Doorashooyinkan ayaa noqon doona kuwii ugu horreeyay ee Galmudug uga dhaca hannaan qof iyo cod ah, iyadoo ay socdaan diiwaangelinta codbixiyeyaasha iyo diyaar-garowga xisbiyada siyaasadeed ee ka qeyb galaya tartanka.
Mas’uuliyiinta Galmudug iyo hay’adaha doorashooyinka ayaa sheegay inay wadaan dadaallo lagu xaqiijinayo in doorashooyinka ay ku dhacaan jawi amni iyo xasillooni leh.
