Wararka24: Wafdi uu hoggaaminayo Taliye Ku xigeenka Ciidanka Booliska Soomaaliyeed Cismaan Cabdullaahi Maxamed (Kaniif) ayaa kulamo amni iyo siyaasadeed ka wada magaalada Dhuusamareeb, xilli uu jiro khilaaf u dhexeeya dowladda federaalka iyo maamulka Galmudug.
Kulamadan ayaa yimid kadib markii magaalada laga dareemay xiisad siyaasadeed oo u dhexeysa Xasan Sheekh Maxamuud iyo Madaxweynaha Galmudug Axmed Cabdi Kaariye (Qoorqoor). Xiisadda ayaa la xiriirta arrimaha doorashooyinka iyo maamulka laamaha ammaanka ee dowlad-goboleedka.
Taliye Kaniif ayaa booqday xarunta Taliska Qaybta 21-aad ee Ciidanka Xoogga Dalka, halkaas oo uu kulan kula yeeshay Taliyaha qaybtaasi Maxamed Cabdi Daahir iyo saraakiil kale. Kulanka ayaa diiradda lagu saaray sugidda ammaanka magaalada iyo doorashooyinka la qorsheeyay inay ka dhacaan Galmudug bilaha June iyo July.
Wararka ayaa sheegaya in saraakiisha dowladda federaalka ay doonayaan in la dhaqan geliyo magacaabista Taliyaha cusub ee Booliska Galmudug Maxamed Daahir Cabdulle. Hase yeeshee, Madaxweyne Qoorqoor ayaa kasoo horjeestay magacaabistaasi, isagoo dib u magacaabay Korneyl Khaliif Cabdulle Maalin oo hore xilka u hayay.
Taliyaha Qaybta 21-aad ayaa horay uga digay in ciidamada militariga lagu dhex daro muranka siyaasadeed ee taagan. Wuxuu ku baaqay in khilaafka lagu xalliyo wada hadal si looga fogaado xaalad amni darro oo ka dhalata magaalada Dhuusamareeb.
Villa Somalia ayaa la sheegay inay walaac ka qabto suurta-galnimada in khilaafka siyaasadeed uu saameyn ku yeesho doorashooyinka deegaanka iyo baarlamaanka ee Galmudug. Dowladda federaalka ayaa sidoo kale doonaysa in doorashooyinkaasi u dhacaan sida qorshuhu yahay.
Dad badan oo ku nool Dhuusamareeb ayaa muujinaya cabsi la xiriirta in xiisadda siyaasadeed ay isku beddesho gacan ka hadal, iyadoo weli ay socdaan dadaallo lagu dejinayo xaaladda.
