Wararka24: Xiisadda siyaasadeed ee u dhexeysa Dowladda Federaalka Soomaaliya iyo maamulka Galmudug ayaa sii xoogeysatay, kadib tallaabooyin cusub oo la sheegay inay qaaday Villa Somalia, kuwaas oo si toos ah u saameynaya maamulka Madaxweyne Axmed Cabdi Kaariye Qoor-Qoor.
Warar lagu kalsoonaan karo ayaa sheegaya in Dowladda Federaalka ay amar siisay ciidamada booliska, NISA iyo milatariga ee ku sugan deegaannada Galmudug in aysan si toos ah uga amar qaadan karin madaxda maamulka Galmudug, balse amarrada looga soo gudbin doono Muqdisho.
Tallaabadan ayaa loo fasirtay mid sare u qaadaysa khilaafka siyaasadeed ee labada dhinac, isla markaana muujineysa isbeddel ku yimid xiriirka Villa Somalia iyo Dhuusamareeb. Ilo wareedyo amni ayaa tilmaamay in dowladda dhexe ay u muuqato mid diyaarineysa isbeddel siyaasadeed oo degdeg ah.
Sidoo kale, waxaa la filayaa in saraakiil sare oo ka tirsan ciidamada booliska Galmudug ay gaaraan magaalada Dhuusamareeb si ay kulamo ula yeeshaan laamaha amniga iyo saraakiisha dowladda federaalka. Kulamadan ayaa la xiriira xaaladda amni iyo muranka ka taagan hoggaanka ciidamada.
Xiisadda ayaa sii xoogeysatay kadib markii Madaxweyne Qoor-Qoor uu buriyay magacaabistii taliye cusub oo dowladda dhexe dhawaan u magacowday Galmudug, isaga oo dib xilka ugu celiyay taliyihii hore. Arrintan ayaa sii muujisay kala aragti duwanaanta ka dhex jirta labada dhinac.
Magaalada Dhuusamareeb waxaa haatan si weyn uga howlgala ciidamada Dowladda Federaalka Soomaaliya, oo ay ku jiraan cutubyo gaar ah sida Danab iyo Gorgor, kuwaas oo amarkooda iyo mushaarkoodaba ka qaata dowladda dhexe.
Wararka ayaa sidoo kale sheegaya in maalmaha soo socda magaalada ay gaari doonaan masuuliyiin sare iyo musharrax la sheegay inuu taageero ka heysto Villa Somalia, taas oo loo arko gogol-xaar u ah isbeddel siyaasadeed oo cusub oo ka dhici kara Galmudug.
