Wararka24: Madaxweynaha dowlad goboleedka Galmudug Axmed Cabdi Kaariye Qoor Qoor iyo wafdi uu hoggaaminayo ayaa maanta soo gaaray magaalada Muqdisho kadib safarro uu ku tegay dalalka Sacuudiga iyo Turkiga.
Soo dhaweyn ayaa loo sameeyay wafdiga, waxaana la filayaa inuu kulamo la yeesho madaxda dowladda federaalka si looga hadlo xaaladda siyaasadeed iyo amni ee dalka.
Ilo wareedyo ayaa sheegaya in kulamadaasi diiradda lagu saari doono isbeddelladii ugu dambeeyay, gaar ahaan xaaladda Koonfur Galbeed iyo tallaabooyinkii militari ee dowladda qaaday.
Sidoo kale, waxaa la filayaa in la falanqeeyo qorshaha doorashooyinka dadweynaha ee la doonayo in laga hirgeliyo Galmudug, iyadoo qaban qaabadii ugu dambeysay ay socoto.
Wararka ayaa intaas ku daraya in sanaadiiqda doorashada la geeyay deegaanno ka tirsan gobollada dhexe, si loo hirgeliyo qorshaha doorasho qof iyo cod ah.
Dhanka kale, waxaa jira dhaqdhaqaaqyo militari oo ka socda Galmudug, kadib markii saanad ciidan la geeyay Dhuusamareeb, taas oo la sheegay in loogu talagalay ciidamo cusub oo tababar loo soo gabagabeeyay.
Ilo wareedyo ayaa tilmaamay in ciidamadaasi lagu xoojinayo amniga doorashooyinka iyo howlgalada ka dhanka ah Al Shabaab.
