Wararka24: Sacdiyo Macalin Cali Xasan, oo loo yaqaano Sacdiyo Bajaaj, ayaa lagu wadaa in maalinta berri ah la horgeeyo Maxkamadda Gobolka Banaadir, si loo guda galo dacwadda loo haysto.
Xeer Ilaaliyaha Qaranka ayaa hore u sheegay in kiiska Sacdiyo uu marayo heer gabagabo ah, iyadoo la dhammaystiray baarista iyo habraacyadii la xiriiray dacwad-oogista.
Sida lagu sheegay wararka la helayo, maxkamadeynta ayaa ka bilaaban doonta hoolka Maxkamadda Gobolka Banaadir, halkaas oo lagu soo bandhigi doono eedaha rasmiga ah ee loo haysto. Eedaha la sheegay inay wajahayso waxaa kamid ah kicin bulsho.
Xoghayaha Golaha Samatabixinta Soomaaliyeed, Maxamed Aadan Koofi, ayaa sheegay inay garab taagan yihiin Sacdiyo Bajaaj, isaga oo ugu baaqay shacabka Soomaaliyeed, gaar ahaan dhalinyarada, inay si nabad ah uga qeyb qaataan la socodka dacwadda.
Koofi ayaa sidoo kale ugu baaqay hay’adaha garsoorka inay u gutaan waajibaadkooda si waafaqsan sharciga, isla markaana ay xaqiijiyaan in dacwadda lagu maamulo hufnaan iyo caddaalad.
Kiiska Sacdiyo Bajaaj ayaa si weyn u soo jiitay indhaha bulshada, waxaana si dhow loola socdaa sida ay u socdaan dhageysiyada maxkamadda iyo go’aamada kasoo bixi doona.
Hay’adaha garsoorka ayaan weli soo saarin wax go’aan ah oo kama dambeys ah, iyadoo la filayo in faahfaahin dheeraad ah ay soo baxdo marka ay maxkamaddu si rasmi ah u bilowdo dhageysiga dacwadda.
